საქართველოს პრეზიდენტი მიხეილ სააკაშვილი რეჟისორ რეზო გაბრიაძის მარიონეტების თოჯინების თეატრის 30 წლის საიუბილეო ღონისძიებებს დაესწრო.
"მახსოვს, 3 წლის წინ, ასეთი მზინაი საღამო იყო, როცა კაფეში ბატონ რეზოსთან ერთად ვისხედით. მაშინ, მან თქვა, რომ საათის კეთებას იწყებდა. გარდა იმისა, რომ ჩვენ გვყავს გენიალური შემოქმედი, რეჟისორი, მწერალი, მართლაც მსოფლიო მოვლენა - ყოველგვარი გადაჭარბების გარეშე. ასევე ბატონი რეზო არის ძალიან გამბედავი და მტკიცე ადამიანი, რადგან ამ წლების განმავლობაში მან გადაიტანა 9 მძიმე ოპერაცია, თუმცა მიუხედავად ამისა, ამ ყველაფერზე მუშაობა არ შეუჩერებია, ისე როგორც ნამდვილი გენიოსი მოიქცეოდა", - აღნიშნა სააკაშვილმა.
პრეზიდენტის შეფასებით, კოშკი, რომელიც თეატრის შენობის ეზოში აშენდა არაფრით არ ჩამოუვარდება, როგორც პრაღის, ასევე ნიუ-იორკისა და ბათუმის კოშკებს.
"შეხედონ ახლა ამას იმ ადამიანებმა, ვინც ფიქრობს, რომ თბილისში მსოფლიო კლასის არაფერი შეიძლება იყოს - რომელია მასზე მაგარი? შეიძლება პრაღა უწევდეს კონკურენციას. ეს არის შედევრი, ყოველგვარი გაზვიადების გარეშე", - აღნიშნა პრეზიდენტმა.
შეგახსენებთ, რომ მარიონეტების თოჯინების თეატრში სარემონტო სამუშოაები უკვე დასრულდა, რომლის ფარგლებშიც შეიცვალა ფასადი და შიდასტრუქტურა. ასევე მოეწყო გარე ინფრასტრუქტურაც.
მარიონეტების თოჯინების თეატრის 30 წლის იუბილეს პრეზიდენტთან ერთად თბილისის მერი გიგი უგულავაც დაესწრო.
