დროებითი საცხოვრებელი ფართი საკუთრებაში აფხაზეთიდან დევნილ უკვე 17 ათას ოჯახს გადაეცა. ამის შესახებ "ჯი-ეიჩ-ენს" საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა კობა სუბელიანმა განუცხადა.
მისივე განმარტებით, ეს პროცესი გრძელდება და იმ დევნილთა რიცხვი, რომელთაც სახელმწიფოსგან ბინები საკუთრებაში მიიღეს, ყოველთვიურად მატულობს.
"აფხაზეთიდან დევნილებს, ძირითადად, ის ობიექტები უკანონდებათ, სადაც ისინი ბოლო 17 წლის განმავლობაში ცხოვრობდნენ, თუმცა ეს არ ეხებათ კომპაქტურ ჩასახლებებში მაცხოვრებელ პირებს, რადგან ასეთ ადგილებში ბინები არ გვაქვს. სამაგიეროდ, კომპაქტური დასახლების ადგილებში მაცხოვრებელ დევნილებს ჩვენ სხვა ადგილებში ვთავაზობთ გარემონტებულ ბინებს. სურვილის შემთხვევაში, შეგვიძლია ისინი მიწებითაც დავაკმაყოფილოთ", - განუცხადა სუბელიანმა "ჯი-ეიჩ-ენს".
შეგახსენებთ, რომ აფხაზეთიდან იძულებით გადაადგილებულმა პირებმა სახელმწიფო ბინები სიმბოლურ ფასად, 1 ლარად მიიღეს.
აღსანიშნავია ისიც, რომ თუკი ახლა დევნილებს ბინების გაყიდვის შემთხვევაში სახელწიფო ბიუჯეტის სასარგებლოდ მოგების გადასახადის გადახდა უწევთ, 1-ელი დეკემბრიდან ამ გადასახადისგან თავისუფლდებიან.
შესაბამისი კანონპროექტის ინიცირება პარლამენტში გასულ კვირას მოხდა და მას საკანონმდებლო ორგანო უახლოეს კვირებში დაამტკიცებს.