საქართველოს მე-10 მოწვევის პარლამენტის საგაზაფხულო სესიის 25 ივნისის პლენარულ სხდომაზე, პარლამენტის წევრმა ქეთევან დუმბაძემ საქართველოს პრემიერ მინისტრს ირაკლი ღარიბაშვილს კულტურის სფეროს წინაშე მდგარ გამოწვევებზე დაუსვა კითხვა.
„არ ვიქნები ორიგინალური და გეტყვით, რომ კულტურის სფერომ განსაკუთრებული დარტყმა მიიღო და ეს ყველაზე მეტად შეეხოთ თავისუფალ ხელოვანებს. მსურს გკითხოთ, არსებობს თუ არა პოსტ-პანდემიური გეგმა, რომელიც გაითვალისწინებს კულტურის მოღვაწეთა ხელშეწყობას“ - აღნიშნა დუმბაძემ.
დეპუტატის მეორე კითხვა ეხებოდა კულტურის სფეროსთვის გამოყოფილ ბიუჯეტს: როგორც ქეთევან დუმბაძემ აღნიშნა, წლევანდელი წელი მნიშვნელოვანი, სასიხარულო ფაქტით დაიწყო, როდესაც კულტურა ცალკე სამინისტროდ ჩამოყალიბდა.
"დასრულებულია რეორგანიზაცია, ჩამოყალიბებულია პრიორიტეტები და თითქმის ყოველ დღე ცხადდება კონკურსები. მაგრამ ბიუჯეტი ძალიან მცირეა. შეგვიძლია თუ არა გვქონდეს იმედი, რომ 2022 წელს არა მხოლოდ აღდგება კულტურისათვის გამოყოფილი ბიუჯეტი, არამედ გაიზრდება კიდეც, მითუმეტეს, როცა ძალიან ბევრი პრიორიტეტული პროექტი არის დასაფინანსებელი, როგორც ქვეყნის შიგნით ასევე საერთაშორისო მიმართულებით, მითუმეტეს, როცა 2024 წელს, ქვეყანა ევროკავშირის წევრობაზე განაცხადის გაკეთებას გეგმავს და ეს პირდაპირპროპორციულად აისახება კულტურის სფეროზეც", განაცხადა დუმბაძემ.
