"სახალხო წარმომადგენლობითმა კრებამ" 42-ე ბატალიონში მომხდარი ინციდენტი დაგმო. ამის შესახებ "სახალხო წარმომადგენლობითი კრების" ოფისში გამართულ ბრიფინგზე "სახალხო კრების" მხარდამჭერმა, სამოქალაქო მოძრაობის "სოლიდარობა უკანონო პატიმრებს" ლიდერმა ეკა ბესელიამ განაცხადა.
"სახალხო წარმომადგენლობითი კრების საინიციატივო ჯგუფი და მისი მხარდამჭერები კატეგორიულად გმობენ შეიარაღებული ძალების მეოთხე, კერძოდ 42-ე ბატალიონში მომხდარ ინციდენტს. ხელისუფლების მხრიდან ძალადობისა და ტერორის, ადამიანის წამების ფაქტებმა ყოველდღიური სახე მიიღო. დღევანდელი რეჟიმი უმოწყალოდ უსწორდება ჟურნალისტებს, ექიმებს, ჯარისკაცებს, ბიზნესმენებს, პედაგოგებს, პოლიტიკურ ოპონენტებსა და რიგით მოქალაქეებს", - განაცხადა ბესელიამ.
მისი თქმით, "სახალხო კრების" საინიციატივო ჯგუფი და მხარდამჭერები გვერდით დაუდგებიან ყველა უსამართლოდ დაჩაგრულს, რეაგირების გარეშე არ დარჩება არც ერთი მსგავსი ძალადობის ფაქტი, მით უფრო, როცა ეს ჯარისკაცებს ეხება.
დღეს პოლიტიკურ პარტიებსა და სხვადასხვა ორგანიზაციას მოკლე ტექსტური შეტყობინება მიუვიდა, რომ 42-ე ბატალიონში 15 ჯარისკაცი იყო ნაცემი.
