ევროპისა და ევრაზიის საკითხებში ამერიკის შეერთებული შტატების სახელმწიფო მდივნის მოადგილის, ფილიპ გორდონის თქმით, შეერთებულ შტატებსა და რუსეთს შორის თანამშრომლობის შეფერხება არც ამერიკას წაადგება, არც რუსეთს და არც ისეთ ქვეყნებს, როგორიც საქართველოა.
"იმის თქმა, რომ უარს ვამბობთ რუსეთთან ურთიერთობაზე, უარს ვამბობთ მასთან საერთო ინტერესების ძიებაზე, უარს ვამბობთ ნებისმიერ სფეროში შეთანხმებაზე, სანამ საქართველოს რთული პრობლემა მოგვარდება, არავის ინტერესებში არ შედის", - განაცხადა გორდონმა რადიო "თავისუფლებისთვის" მიცემულ ინტერვიუში.
მან კიდევ ერთხელ აღნიშნა, რომ შეერთებული შტატები არ აღიარებს საქართველოს კონფლიქტური რეგიონების დამოუკიდებლობას და მისი არაღიარებისკენ სხვა ქვეყნებსაც მოუწოდებს.
"მხარს ვუჭერთ ჟენევის ფორმატსაც. ვაშინგტონი ცდილობს, ხელი შეუწყოს საერთაშორისო ორგანიზაციების დაბრუნებას საქართველოს კონფლიქტურ რეგიონებში", - განმარტა გორდონმა.
