საქართველოს თავდაცვის სამინისტრომ მეოთხე ქვეითი ბრიგადის 42-ე ბატალიონში მომხდარ ინციდენტთან დაკავშირებით გამოძიება დაიწყო. ამის შესახებ თავდაცვის სამინისტროს ოფიციალურ განცხადებაშია ნათქვამი.
მასში ასევე აღნიშნულია, რომ 42-ე ბატალიონის შეიარაღების საწყობში მორიგი აღრიცხვიანობის დროს, სერჟანტმა ერთი ავტომატური იარაღის დანაკლისი აღმოაჩინა, რასაც რამდენიმე კაპრალს შორის შელაპარაკება და დაპირისპირება მოჰყვა.
"ამ დროისთვის ინციდენტი ამოწურულია, მომხდარზე მიმდინარეობს გამოძიება", - ნათქვამია ახალაიას უწყების განცხადებაში.
შეგახსენებთ, რომ არასამთავრობო ორგანიზაციის, "ყოფილი პოლიტპატიმრები ადამიანის უფლებებისათვის" ხელმძღვანელის, ნანა კაკაბაძის ინფორმაციით, 42-ე ბატალიონის ალფა ასეულში წუხელ ღამით 15 ჯარისკაცს სცემეს. როგორც კაკაბაძემ "ჯი-ეიჩ-ენს" აცნობა, აღნიშნული ინფორმაცია მან სამხედრო ნაწილის ჯარისკაცებიდან მიიღო.
"გამომიგზავნეს შMშ-ები, სადაც საუბარია, რომ ნაცემია გორელი ჯარისკაცი, კაპრალი ჩოჩელი, რომელიც შვებულებიდან სამხედრო ნაწილში დაბრუნდა და იარაღი დაკარგული დახვდა. ამისთვის მოსთხოვეს პასუხი და სცემეს", - განუცხადა კაკაბაძემ "ჯი-ეიჩ-ენს".
მისი თქმით, ნაცემები არიან ასევე სერჟანტი კიკნაძე, რომელმაც შეურაცხყოფის გამო ვენები გადაიჭრა.
"ნაცემია, ასევე, გვარად ნადირაძე, სულ 15 ჯარისკაცი", - ამტკიცებს კაკაბაძე.
