"ვარდების რევოლუციის" შედეგი ის არის, რომ საქართველო # 1 რეფორმატორი ქვეყანა გახდა. ამის შესახებ საქართველოს პრეზიდენტმა მიხეილ სააკაშვილმა მსოფლიო ბანკის მიერ გამოქვეყნებულ ბოლო კვლევაზე კომენტირებისას განაცხადა.
"თუ მკითხავთ, რა არის შედეგი "ვარდების რევოლუციის" - იმის, რომ ხალხი იდგა წვიმაში, არ შეეპუა უსამართლობას, ხმა აიმაღლა ამის წინააღმდეგ, გეტყვით: ჯამში საქართველო არის # 1 რეფორმატორი ქვეყანა", - განაცხადა სააკაშვილმა.
"5 წლის განმავლობაში იყო შეცდომებიც, ტრაგედიებიც, მაგრამ საბოლოო ჯამში, მსოფლიო ბანკმა მიიჩნია, რომ არც ერთ ქვეყანას არ გაუკეთებია იმაზე მეტი ამ 5 წლის განმავლობაში, რაც გაკეთდა საქართველოში", - განმარტა ქვეყნის პირველმა პირმა.
მისი შეფასებით, მსოფლიო ბანკის მიერ გამოქვეყნებული რეიტინგი, საბოლოო ჯამში, საქართველოს რიგითი მოქალაქეების წარმატებასა და კეთილდღეობას წაადგება.
"ინვესტორი რომ ჩამოვა საქართველოში და მოინდომებს რამის აშენებას, აქ უნდა დახვდნენ კვალიფიციური კალატოზები, დურგლები, შემდუღებლები", - აღნიშნა საქართველოს პრეზიდენტმა.
შეგახსენებთ, რომ მსოფლიო ბანკის მიერ გამოქვეყნებული ბიზნესის წარმოების რეიტინგის მიხედვით, საქართველომ მე-13 ადგილიდან მე-12 პოზიციაზე გადაინაცვლა. ბიზნესის რეგულირების რეფორმის სფეროში კი საქართველო ყველაზე აქტიურ რეფორმატორ ქვეყანად დასახელდა.
