საპარლამენტო უმრავლესობის ერთ-ერთი ლიდერის დავით დარჩიაშვილის შეფასებით, "მითი რუსეთის სპეცსამსახურების უძლეველობის შესახებ, თუკი ის ოდესმე არსებობდა, საბოლოოდ დამსხვრეულია".
"არამგონია, რომ ვინმეს რუსეთის სპეცსამსახურების უძლეველობის შესახებ მითის ოდესმე მაინც სჯეროდა, მაგრამ თუკი ასე იყო, ის აღარ არსებობს", - განუცხადა დარჩიაშვილმა "ჯი-ეიჩ-ენს" ქართული მხარის მიერ რუსეთთან ჯაშუშობაში ეჭვმიტანილი პირების დაკავების საკითხზე კომენტირებისას.
მისივე განმარტებით, აღნიშნულს მოსკოვში მწვავე რეაქცია მოჰყვება, თუმცა ამის გამო, საქართველოს ხელისუფლება ეროვნული ინტერესების დაცვაზე უარის თქმას არ აპირებს.
"რუსეთის მხრიდან მწვავე რეაქციები, ბუნებრივია, იქნება. საერთოდ, საქართველოს არსებობა განაპირობებს მის მწვავე რეაქციებს, მაგრამ ამის გამო ჩვენ ჩვენი ეროვნული ინტერესების დაცვაზე უარს ვერ ვიტყვით", - განმარტა დეპუტატმა და აქვე განმარტა, რომ ჯაშუშების დაკავების გამო რუსეთთან ურთიერთობებში თვისობრივ ცვლილებებს არ ელოდება.
"ამის გამო ურთიერთობებში თვისობრივ ცვლილებებს ნამდვილად არ ველოდები, რადგან რუსეთის აგრესიის გამო ის ისედაც ძალიან მძიმეა და ამის კიდევ უფრო დამძიმება, მოცემულ ვითარებაში, ძნელად წარმომიდგენია", - დასძინა დარჩიაშვილმა "ჯი-ეიჩ-ენთან" საუბარში.
ამასთან, საპარლამენტო უმრავლესობის ერთ-ერთმა ლიდერმა სადაზვერვო საქმიანობისას "იმპერიული მეთოდების" გამოყენებისთვის მოსკოვი კიდევ ერთხელ გააკრიტიკა და განმარტა, რომ ჯაშუშურ მეთოდებს საქართველო არასდროს გამოიყენებს.
"ჩვენ ამის არც საჭიროება და არც შესაძლებლობა გვაქვს. ღია პოლიტიკითაც ბევრად მეტი შედეგის მიღწევა შეგვიძლია რუსეთთან კონფრონტაციაში", - განმარტა მან.
შეგახსენებთ, რომ საქართველოს შინაგან საქმეთა სამინისტროს კონტრდაზვერვის დეპარტამენტმა რუსეთის სპეცსამსახურებთან თანამშრომლობის ბრალდებით 13 ჯაშუში დააკავა.
