ექსპერტის, საერთაშორისო საკითხებში კახა გოგოლაშვილის შეფასებით, ქართული მხარის მიერ ჯაშუშების დაკავება საქართველო-რუსეთის ურთიერთობებში ვერაფერს შეცვლის, რადგან "არსებულზე ცუდის წარმოდგენა წარმოუდგენელია".
"იმაზე ცუდი ურთიერთობები რაც ახლა გვაქვს რუსეთთან, შეუძლებელია წარმოვიდგინოთ, რადგან ჩვენი ტერიტორიები ოკუპირებულია.
ეს არ არის 2006 წელი, როცა ქართულმა მხარემ რუსეთთან ჯაშუშობაში ეჭვმიტანილი პირები პირველად დააკავა. მაშინ ჩვენ რაღაც ჯერ კიდევ გვქონდა დასაკარგი. ახლა კი, მდგომარეობის კიდევ უფრო უარესობისკენ შეცვლა წარმოუდგენლად მიმაჩნია - რუსეთი ომს თავიდან არ დაიწყებს", - განუცხადა გოგოლაშვილმა "ჯი-ეიჩ-ენს", საქართველოს შინაგან საქმეთა სამინისტროს მიერ რუსეთის სასარგებლოდ ჯაშუშების დაკავების საკითხზე კომენტირებისას.
ამასთან, მისივე განმარტებით, რუსეთის მმართველობის, მათ შორის სადაზვერვო სტრუქტურების აქტიური სისტემური მოშლა მიმდინარეობს, რასაც სხვადასხვა სახელწიფოს მიერ რუსეთის სპეცსამსახურებთან თანამშრომლობაში ეჭვმიტანილი პირების ბოლო დროს გახშირებული დაჭერებიც მოწმობს.
"ფაქტია, რომ ხდება დეგრადაცია რუსეთის სადაზვერვო სტრუქტურების. მთლიანად რუსული მმართველობის, რომელიც კორუმპირებული და არაჯანსაღია. ვერ გეტყვით, ამას სხვადასხვა ქვეყნები კოორდინაციის შედეგად ახდენენ თუ არა, მაგრამ ეს ფაქტია. ჩემი აზრით, მაინც დამოუკიდებლად მოქმედებენ და ამ კუთხით ქვეყნებს შორის ინფორმაციების გაცვლა-გამოცვლა არ ხდება", - განმარტავს ექსპერტი.
რაც შეეხება ქართული მხარის მიერ დაკავებულ ჯაშუშებთან დაკავშირებით რუსეთში გამოთქმულ კრიტიკასა და აღშფოთებას, კახა გოგოლაშვილი მას ბუნებრივ რეაქციად აფასებს და განმარტავს, რომ მოსკოვი ამით საერთაშორისო საზოგადოებისა და საკუთარი ხალხის წინაშე თავის გამართლებასა და "დაჩაგრულის მდგომარეობაში" წარმოჩენას ცდილობს.
"რუსეთში შეუძლიათ მომხდარზე მხოლოდ აღშფოთება გამოთქვან და ეს იქნება ყველაფერი. ამის იქითYსხვა არაფერი მოხდება", - განუცხადა კახა გოგოლაშვილმა "ჯი-ეიჩ-ენს".
შეგახსენებთ, რომ საქართველოს შინაგან საქმეთა სამინისტროს კონტრდაზვერვის დეპარტამენტმა რუსეთის სპეცსამსახურებთან თანამშრომლობის ბრალდებით 13 ჯაშუში დააკავა.
