"პოლიტიკური ფარსი" უწოდა საქართველოში ჯაშუშობაში ბრალდებული რუსეთის მოქალაქეების დაკავებას რუსეთის საგარეო საქმეთა მინისტრის მოადგილემ გრიგორი კარასინმა.
მისივე თქმით, რუსეთის საგარეო საქმეთა სამინისტრო საქართველოში თითქოს დაკავებული ჯაშუშობაში ბრალდებული რუსეთის მოქალაქეების შესახებ უფრო დაწვრილებით ინფორმაციას დაელოდება, მანამ ვიდრე ამ ინფორმაციაზე რეაგირებას მოახდენს.
"მოდით დაველოდოთ და ვნახოთ, რამდენად დამაჯერებელი იქნება ეს პოლიტიკური ფარსი იმისათვის, რომ ჩვენ მასზე კომენტარები გავაკეთოთ", _ აცხადებს კარასინი და აღნიშნავს, რომ კომენტარების გაკეთებამდე ისინი "ფაქტურას ელოდებიან".
"მოდით დაველოდოთ და მივცეთ შეფასება იმას, რაც მოხდება მედიასფეროში ამასთან დაკავშირებით", _ აცხადებს სერგეი ლავროვის მოადგილე.
შეგახსენებთ, რომ საქართველოს შს სამინისტროს კონტრდაზვერვის დეპარტამენტმა ჩაატარა მასშტაბური ოპერაცია, რომელის შედეგადაც გამოვლინდა რუსეთის ფედერაციის თავდაცვის სამინისტროს გენერალური შტაბის მთავარი სადაზვერვო სამმართველოსთან ე.წ. გრუსთან ფარულ კავშირში მყოფი პირები.
გატარებული ღონისძიებების შედეგად გამოვლენილი იქნა ათეულობით პირი რომლებიც თანამშრომლობდნენ ან სხვა და სხვა სახით დაკავშირებულნი იყვნენ რუსეთის ფედერაციის სპეცსამსახურებთან, მათგან 13 პირი იქნა დაკავებული შემდეგი მუხლებით "ჯაშუშობა" და "უცხოეთის სადაზვერვო სამსახურში შესვლა". აქედან ოთხი არის რუსეთის ფედერაციის მოქალაქე.
