საქართველოში შეერთებული შტატების ელჩი კელი დეგნანი იმედოვნებს, რომ იუსტიციის უმაღლესი საბჭო მოსამართლეების დანიშვნას გადაავადებს.
ელჩმა დეგნანმა პარლამენტის თავმჯდომარესთან შეხვედრის შემდეგ, საკანონმდებლო ორგანოში გამართულ ბრიფინგზე მოუწოდა იუსტიციის უმაღლეს საბჭოს, გადადოს 26 მაისს დაგეგმილი მოსამართლეთა კონფერენცია და შეწყვიტოს დანიშვნები იუსტიციის საბჭოსა და უზენაეს სასამართლოში.
"დანიშვნის პროცედურა, იქნება ეს იუსტიციის უმაღლესი საბჭო თუ უზენაესი სასამართლო, არ შეესაბამება 19 აპრილის შეთანხმების სულისკვეთებას, სადაც მხარეები შეთანხმდნენ განეხორციელებინათ არსებითი და მნიშვნელოვანი რეფორმები იუსტიციის უმაღლეს საბჭოში, შერჩევის, დანიშვნისა და დაწინაურების პროცესში, ისევე როგორც უზენაესი სასამართლოს შერჩევის პროცესში. ეს დანიშვნები უნდა მოხდეს ახალი, რეფორმირებული და ძლიერი სისტემით, რომელიც მხარეებთან და ყველა პოლიტიკურ პარტიასთან ინკლუზიური დებატების შედეგია. სწორედ ამიტომ მოვუწოდებდით საბჭოს გადაედო შეხვედრა, მისი გადადება ივლისამდე შესაძლებელი. ასე რომ იქამდე ბევრი დროა, რაც რეფორმის გატარების საშუალებას იძლევა, რაც მართლმსაჯულებას უფრო ძლიერს და დამოუკიდებელს გახდის. სწორედ ამას მოვუწოდებდით და ვიმედოვნებთ, რომ საბჭო ამას გაითვალისწინებს და გადაავადებს შერჩევის პროცესს", - განაცხადა ელჩმა.
იუსტიციის უმაღლეს საბჭოს მოსამართლეთა დანიშვნის პროცედურების გადადებისკენ მოუწოდეს ოპოზიციურმა პოლიტიკურმა პარტიებმა და არასამთავრობო ორგანიზაციებმა.
შეგახსენებთ, 26 მაისს დაინიშნა მოსამართლეთა რიგგარეშე კონფერენცია, რომლის დღის წესრიგშიც ერთ-ერთ საკითხად შეტანილია იუსტიციის უმაღლესი საბჭოს 4 ახალი წევრის არჩევა. საბჭოს მოქმედ წევრებს, დიმიტრი გვრიტიშვილს, ირაკლი ბონდარენკოს, ვასილ მშვენიერაძესა და ირაკლი შენგელიას უფლებამოსილების ვადა ივნისში ეწურებათ.
