ირანის საგარეო საქმეთა მინისტრ მანუჩეჰრ მოთაქის თქმით, იმ შემთხვევაში, თუ ქმრის მკვლელობაში ბრალდებულს ირანის სასამართლო სასიკვდილო განაჩენს გამოუტანს, მას სიკვდილით დასჯიან. როგორც მინისტრმა ჟურნალისტებს განუმარტა, ირანის კანონმდებლობის მიხედვით, მკვლელობაში ბრალდებული სიკვდილით ისჯება და ამის შესახებ გადაწყვეტილება სასამართლომ უნდა მიიღოს.
"დანაშაული ყველა ქვეყანაში დანაშაულია და უნდა დაისაჯოს. თუ სასამართლო ქმრის მკველობისთვის მას სიკვდილით დასჯას მიუსჯის, ის აღსრულდება. თუმცა არსებობს გამონაკლისი შემთხვევები, როდესაც მოკლულის ოჯახი ითხოვს მკვლელის განაჩენის შემსუბუქებას. ასეთ შემთხვევაში, მას სიკვდილით აღარ დასჯიან", _ განაცხადა ირანის საგრეო საქმეთა მინისტრმა.
შეგახსნებთ, რომ ირანის სასამართლო ხელისუფლება ქმრის ღალატსა და მკვლელობაში ბრალდებული ქალის, საკინეჰ მოჰამმადი აშტიანის სიკვდილით დასჯას აპირებს. განცხადებას ამის შესახებ სიკვდილით დასჯის საწინააღმდეგო საერთაშორისო კომიტეტმა გაავრცელა. მათი ინფორმაციით, თაბრიზის ციხის ხელმძღვანელობისთვის, სადაც აშტიანი იმყოფება, უკვე გადაცემულია განკარგულება იმის შესახებ, რომ სასჯელი სისრულეში უნდა იქნეს მოყვანილი. არ ვრცელდება ინფორმაცია იმის შესახებ, თუ კონკრეტულად რა მეთოდით დასჯიან ქალს სიკვდილით - ჩამოახრჩობენ თუ მანამ ესვრიან ქვებს, ვიდრე არ გარდაიცვლება.
2006 წელს 43 წლის აშტიანს "სანგსარი" მიუსაჯეს - ეს სასჯელის ფორმაა, რომელიც გათვალისწინებულია ისლამური კანონმდებლობით, როგორც სასჯელის უმაღლესი ზომა. ეს სიკვდილით დასჯის განსაკუთრებით სასტიკი მეთოდია - ქვებს მანამ ესვრიან ბრალდებულს, ვიდრე ის არ გარდაიცვლება. როგორც წესი, ეს განაჩენი ცოლქმრულ ღალატში ბრალდებულებისთვის გამოაქვთ. აღსანიშნავია,¸რომ ეს სასჯელი ქალების მიმართ უფრო ხშირად გამოიყენება, ვიდრე კაცების.
აშტიანის განაჩენის შეცვლას უკვე დიდი ხანია ითხოვენ საერთაშორისო ორგანიზაციები, აშშ-ისა და საფრანგეთის რიგი მედიასაშუალებები, კულტურისა და საზოგადოების ცნობილი მოღვაწეები.
ირანული წყაროების ინფორმაციით, აშტიანი სასამართლომ ბრალდებულად აღიარა "ღალატში, მკვლელობასა და სხვა დანაშაულში".
