ირანის ისლამური რესპუბლიკა საქართველოს ტერიტორიულ მთლიანობას და სუვერენიტეტს მხარს უჭერს. ამის შესახებ ირანის საგარეო საქმეთა მინისტრმა ქართველ კოლეგასთან, გრიგოლ ვაშაძესთან შეხვედრის დასრულების შემდეგ ერთობლივ პრესკონფერენციაზე განაცხადა.
მისი თქმით, კავკასიაში მიმდინარე მოვლენები ირანისთვის მნიშვნელოვანია.
"ორ ქვეყანას შორის ურთიერთობები ტერიტორიული მთლიანობის პრინციპებზე ფუძნდება. იმედი გვაქვს, კავკასიის რეგიონში არსებული პრობლემები მშვიდობიანი გზით გადაწყდება. მზად ვართ, აღნიშნულ საკითხებში გადამწყვეტი როლი შევასრულოთ", - აღნიშნა მანუჩეჰრ მოთაქიმ.
მისი თქმით, შესაძლებელია, კასპიისა და შავი ზღვის აუზის ქვეყნებმა ერთობლივი შეხვედრა გამართონ, რომელზედაც რეგიონში უსაფრთხოების საკითხები განიხილება.
ვაშაძემ ირანელ კოლეგასა და ირანელ ხალხს ტერიტორიული მთლიანობის მხარდაჭერისთვის მადლობა გადაუხადა.
