კორონავირუსის შესუსტებას რომ არაფერი კავშირი აქვს სითბოსთან, ეს ბევრმა მაგალითმა გვიჩვენა, თუნდაც ახლა ინდოეთმა, - ამის შესახებ ინფექციონისტმა, მაია ბუწაშვილმა „ფორმულას“ ეთერში განაცხადა.
„რაღაც კუთხით შეიძლება ზაფხული დადებითად მოქმედებდეს, რადგან უფრო გარეთ და ღია სივრცეშია ხალხი, მაგრამ საერთო ეპიდემიოლოგიურ სურათს ზაფხულის სეზონი დიდად არ ცვლის“, - განაცხადა მაია ბუწაშვილმა.
შეგახსენებთ, რომ 21 აპრილს დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა, რომ პიკი, რომელსაც აპრილის ბოლოსა და მაისის პირველ ორ კვირაში ელოდებიან, არ იქნება ისეთი დრამატული, როგორიც ნოემბერსა და დეკემბერში.
„დაავადებათა კონტროლის ეროვნული ცენტრის ხელმძღვანელის განცხადებით, ზამთარი რესპირატორული ვირუსებისთვის კომფორტული პერიოდია, ახლა კი ქვეყანაში დათბა და ვარაუდობენ, რომ მზის სხივი ვირუსზე დამთრგუნველად იმოქმედებს“,- თქვა გამყრელიძემ.
ამ დროისთვის საქართველოში კორონავირუსის 308834 შემთხვევაა დადასტურებული. მათ შორის გამოჯანმრთელდა 289976, გარდაიცვალა 4095 პაციენტი.