"ნამახვანჰესის" მოწინააღმდეგეები ქუთაისში საპროტესტო აქციას მართავენ.
საპროტესტო აქციის მონაწილეები ქალაქის ჭავჭავაძის გამზირდე ფეხით გადაადგილდებიან, მათ ცენტრალური საავტომობილო გზა გადაკეტილი აქვთ.
აქციის ერთ-ერთი ორგანიზატორის გოლეთიანის თქმით, მთავრობამ დღევანდელი გადაწყვეტილებებით "რიონის ხეობის მცველებთან" მოლაპარაკება ჩაშალა.
"კიდევ ერთხელ მოვუწოდებთ ხელისუფლებას, შეხედოს და გააცნობიეროს, რასთან აქვს საქმე და გაითვალისწინოს მისი უდიდებულესობა ქართველი ხალხი. ყველა ქალაქიდან, ყველა რეგიონიდან, ყველა სოფლიდან დავიძვრებით თბილისში და მათთვის არ იქნება ადვილი იმ სიმრავლის ხილვა. მოუწევთ დათმობებზე წასვლა, რაზეც აქამდე არცკი უფიქრიათ, გულში არცკი გაუვლიათ. ურთულესი გადაწყვეტილების წინაშე დადგებიან ისინი. ამიტომ, მოვუწოდებთ მათ – არ ჩამოგვიყვანოთ", – განაცხადა ვარლამ გოლეთიანმა.
შეგახსენებთ, დღეს, "ნამახვანჰესის" აქციის ორგანიზატორთა მოთხოვნების საპასუხოდ, მთავრობამ გამოაქვეყნა განცხადება, სადაც პროექტის ირგვლივ მიღებული გადაწყვეტილებების შესახებ არის საუბარი.
"ნამახვანჰესის" საწინააღმდეგო აქციის ერთ-ერთი ორგანიზატორის, ვარლამ გოლეთიანის განცხადებით, მთავრობამ არ გაითვალისწინა მათი მოთხოვნები, რის გამოც 23 მაისიდან თბილისში დაიწყება უწყვეტი და ფართომასშტაბიანი აქციები.
