ოფიციალური თბილისი აფხაზეთის დე-ფაქტო საგარეო საქმეთა სამინისტროს ბრალდებებს პასუხობს.
როგორც საქართველოს საგარეო საქმეთა მინისტრის მოადგილე ნინო კალანდაძემ "ჯი-ეიჩ-ენს" განუცხადა, აფხაზეთის სეპარატისტული ხელისუფლების მიერ აფხაზი მოქალაქეების "გაუჩინარებაში" ქართული მხარის დადანაშაულება უსაფუძვლოა და მათზე თბილისი პასუხს ვერ აგებს.
"აფხაზეთში უკონტროლო სიტუაციაა. ვისაც აფხაზი მოქალაქეების დაცვაზე პასუხისმგებლობა აქვს აღებული, ის ამას ვერ უზრუნველყოფს, ამიტომაც გამორიცხული არ არის, რომ იქ ადამიანთა გატაცებები მართლაც ხდებოდეს, თუმცა ამაში ჩვენი დადანაშაულება უსაფუძვლოა. სამწუხაროდ, საქართველოს ხელისუფლება აფხაზეთში იურისდიქციას ვერ ახორციელებს და აქედან გამომდინარე, ვერ ერთ დაკარგულ აფხაზ მოქალაქეზე პასუხს ვერ ვაგებთ", - განუცხადა კალანდაძემ "ჯი-ეიჩ-ენს".
ამასთან, მინისტრის მოადგილე აფხაზეთის დე-ფაქტო საგარეო უწყებას შეახსენებს, რომ "არსებობს ჟენევის ფორმატი, რომლის ფარგლებშიც მათ ნებისმიერი საკითხის დაყენება შეუძლიათ".
შეგახსენებთ, რომ აფხაზი სეპარატისტები ქართულ მხარეს კვლავ აფხაზეთის ე. წ. მოქალაქეების გატაცებაში ადანაშაულებენ. აფხაზეთის ე. წ. საგარეო საქმეთა სამინისტროს მიერ რამდენიმე დღის წინ გავრცელებული ინფორმაციით, ქართველმა სამართალდამცველებმა გალის რაიონის სოფელ რეპის ბრიგადირი, 65 წლის ნუგზარ ფარფალია გაიტაცეს.
ამასთან დაკავშირებით, სეპარატისტები კვლავ მოითხოვენ საქართველოში ბაზირებული საერთაშორისო ორგანიზაციების ჩართვას აფხაზეთის ე. წ. მოქალაქეების გატაცების გამოძიების საქმეში და ქართული მხარისგან მოითხოვენ, აცნობოს მათ ინფორმაცია - "ადრე გატაცებული აფხაზეთის მოქალაქეების, დავიდ სიგუასა და გარი ჯოპუას ადგილსამყოფელის შესახებ".
