გერმანიაში დროებით ლეგალურად დასაქმება საქართველოს 5 000-მდე მოქალაქეს შეეძლება. ინფორმაციას დასაქმების ხელშეწყობის სახელმწიფო სააგენტო ავრცელებს.
უწყების ინფორმაციით, გერმანიაში საქართველოს მოქალაქეთა დასაქმებისთვის აქამდე გამოყოფილი კვოტა (500 ადამიანი) 5000-მდე, დასაქმების ხელშეწყობის სახელმწიფო სააგენტოსა და გერმანიის შრომის ფედერალურ სააგენტოს შორის გაფორმებული შეთანხმების ფარგლებში, გაიზარდა.
დასაქმების ხელშეწყობის სახელმწიფო სააგენტოს ინფორმაციით, ვაკანსიებია შტუდგარდის, დუსელდორფისა და ბრანდენბურგის რეგიონების დამსაქმებლებისგან. დაგეგმილია რეგიონების არეალის უფრო მეტად გაფართოება.
ამ ეტაპზე გერმანიაში დროებით ლეგალურ დასაქმებაზე 97 682 პირია დარეგისტრირებული.
„უკვე დაწყებულია ტრეინინგები, სადაც თითოეული სამუშაოს მაძიებელი იღებს ინფორმაციას დასაქმების პირობებისა და სოციალურ გარანტიების შესახებ. გამგზავრების წინ ტრენინგი მიგრაციის საერთაშორისო ორგანიზაციის IOM-ის მონაწილეობითა და მხარდაჭერით ხორციელდება“, – აცხადებენ დასაქმების ხელშეწყობის სახელმწიფო სააგენტოში.
სეზონური სამუშაოები გერმანიაში აპრილიდან იწყება.