"გირჩი - მეტი თავისუფლების" ლიდერი ზურა ჯაფარიძე ვლადიმერ პოზნერის ვიზიტს Facebook-ზე ეხმაურება:
"ესაა ჩამოსული ათობით მეგობართან ერთად, დაბადების დღე უნდა აღნიშნოს საქართველოში. ქართული პოლიციის ესკორტით მოძრაობს. ქართული პოლიციით გარშემორტყმულ რესტორანში ზის ამ მომენტში. როცა საქართველოს მოქალაქეებს პირბადის არტარებაზე აჯარიმებენ ქუჩაში, ეს თავისუფლად გადაადგილდება ქუჩაში და რესტორანშიც ქეიფობს", - წერს ჯაფარიძე.
დღეს ცნობილი გახდა, რომ თბილისში რუსეთიდან ჩარტერული რეისით, ვლადიმერ პუტინთან დაახლოებული ჟურნალისტი, კრემლის პროპაგანდისტი ვლადიმერ პოზნერი ჩამოფრინდა. პოზნერს ხვალ დაბადების დღე აქვს და იუბილეს საქართველოს დედაქალაქში აღნიშნავს. "მესამე წელია, დაბადების დღეს თბილისში აღვნიშნავ. ჩამოვედი არა პოლიტიკაზე სასაუბროდ, არამედ დაბადების დღის აღსანიშნავად", - თქვა პოზნერმა.
შეგახსენებთ, ვლადიმერ პოზნერის ეკუთვნის ფაზა, რომ "აფხაზეთი აღარასდროს იქნება საქართველოს ნაწილი".
პოზნერის ჩამოსვლის შესახებ ინფორმაცია თავდაპირველად ელენე ხოშტარიამ გაავრცელა.
საქართველოში მყოფმა რუსმა პროპაგანდისტმა, ვლადიმირ პოზნერმა და მასთან მყოფმა 50-მდე ადამიანმა კაფე სტამბიდან რესტორან ვინოტელში გადაინაცვლეს. ისინი პოზნერის დაბადების დღის აღნიშვნას აპირებენ და ამავდროულად, კომენდანტის საათს არღვევენ.
ვინოტელთან შეკრებილი სამოქალაქო აქტივისტები აცხადებენ, რომ პოზნერს არ მისცემენ მშვიდად დროსტარების საშუალებას.
შრომის ინსპექციამ სასტუმრო „ვინოტელი“, სადაც ვლადიმერ პოზნერი და მისი სტუმრები იმყოფებიან, 10 000 ლარით დააჯარიმა.
შრომის ინსპექციამ გამოავლინა 322-ე დადგენილებით აკრძალული საქმიანობის განხორციელება. გამოიკვეთა სამართალდამრღვევი იურიდიული პირი და ობიექტის მიმართ გამოყენებულ იქნება შესაბამისი სანქცია, 10 000 ლარის ოდენობით”, - განაცხადა შრომის ინსპექციის წარმომადგენელმა.
