საპარლამენტო ფრაქცია "ქართული ოცნების" თავმჯდომარე მამუკა მდინარაძე აცხადებს, რომ ოპოზიციასთან მოლაპარაკებებისას, მმართველმა გუნდმა 3-ზე მეტი მსხვილი კომპრომისული წინადადება წარადგინა.
მდინარაძის განცხადებით, ოპოზიციის მხრიდან კომპრომისული ნაბიჯები არ გადმოდგმულა.
"მე შემიძლია ერთი რამე გითხრათ, ვფიქრობ, მალე მომეცემა საშუალება დეტალებზე ვისაუბრო. მე შემიძლია გითხრათ, რომ ჩვენი მხრიდან, არა ერთი და ორი, არამედ სამი და მეტი მსხვილი კომპრომისული წინადადება იყო.
იყო პრინციპული საკითხები, სადაც სამართლის და სახელმწიფოებრივი დამოკიდებულების წინააღმდეგ არ წავედით. ამაზე გაცილებით მეტი იყო ის კომპრომისული წინადადებები თავისი დეტალური ჩაშლით, რაზეც წარმოუდგენელი იყო უარის მიღება. მათი მხრიდან კომპრომისული ნაბიჯი არც ერთი არ გადმოდგმულა,"- განაცხადა მამუკა მდინარაძემ "რუსთავი 2"-ის ეთერში.
შეგახსენებთ, გუშინ, კრისტიან დანიელსონის მედიაციით მიმდინარე მოლაპარაკებები ხელისუფლებასა და ოპოზიციას შორის უშედეგოდ დამთავრდა.