„ქართულმა ოცნებამ“ დიდი დარტყმა მიაყენა საქართველოს ევროატლანტიკურ პერსპექტივებს, - აცხადებს „სტრატეგია აღმაშენებლის“ ლიდერი გიორგი ვაშაძე.
მისი თქმით, „ქართული ოცნება“ იმდენად არაადეკვატურად იქცეოდა, რომ ოპოზიციამდე შეთანხმების დოკუმენტი არ მოსულა, ანუ ევროპულმა მხარემ იმდენად არასამართლიანად და ევროპულ სტანდარტებთან მიუღებლად ჩათვალა „ქართული ოცნების“ მიერ დაყენებული პირობები, რომ არც კი დაძრულა ეს საკითხი.
"ამით „ქართულმა ოცნებამ“ მათ აჩვენა, რომ მხოლოდ ძალაუფლების შენარჩუნება აინტერესებს და არ ფიქრობს ევროატლანტიკურ ინტეგრაციაზე. მათ ძალიან ცუდად გამოიყენეს შარლ მიშელის სახელი ამ პროცესში და დიდი დარტყმა მიაყენეს ჩვენს ევროპულ პერსპექტივას.
ყველა საკითხი, რომელიც შარლ მიშელმა დოკუმენტში ჩამოწერა და რაზეც თანხმობა მისცა „ქართულმა ოცნებამ“, უნდა ყოფილიყო დოკუმენტში, მაგრამ როგორც ჩანს, „ოცნების“ პოზიციები სრულად შეიცვალა. მათ ჰგონიათ, რომ მიშელთან ურთიერთობა თამაშია და შეუძლიათ, საზოგადოებას კიდევ ნაცარი დააყარონ და მოატყუონ. მე პირადად არ ვაპირებ, რომ ამას შევეგუო, არ ვაპირებ, „ქართულ ოცნებას“ ჩავაბარო ევროპული ინტეგრაციის პერსპექტივა და სხვა ოპოზიციურ პარტიებთან ერთად გავაკეთებ ყველაფერს, რათა საქართველო დადგეს ნორმალური განვითარების გზაზე“, – განაცხადა ვაშაძემ.
შეგახსენებთ, გუშინ, კრისტიან დანიელსონის მედიაციით მიმდინარე მოლაპარაკებები ხელისუფლებასა და ოპოზიციას შორის უშედეგოდ დამთავრდა.
