ისე ყველაფერი რასაც ჩვენ გვაბრალებდა თვითონ აღასრულა. სიმწვანეს და ეკოლოგიას ებრძვითო და გადაგლიჯა მთელი ფლორა, სულ წყალში აცურავა, წერს სოციალურ ქსელში ევროპული საქართველოს წარმომადგენელი გიგი უგულავა თბილისში მეწყრული პროცესის გააქტიურებასთან დაკავშირებით.
"ბათუმში მტირალას მთას ჭრითო. კი დგას ის მთა მტირალი გამომეტყველებით. სამაგიეროდ, აგერ თბილისში ვაშლიჯვრის გორას ასეკვესტრებს. ვალებით აშენებთ ქვეყანას და ამხელა ვალი ქვეყანას მისდღემში არ ქონია. სამუშაო ადგილებს შევქმნი, 100 ქარხანას ავაგუგუნებო და მხოლოდ პარტაქტივი ახეირა. დემოკრატია და პროპორციული არჩევნების ნაცვლად, პროვინციულ ფაშიზმზე დამყნობილი ოლიგარქატი გააფორმა.
და ამ ყველაფრის მერე, მაინც რომ უნდა ელაპარაკო, აი ესაა დემოკრატია. თუმცა კაცმა რომ თქვას, ეს რა ლაპარაკია - მაგიდასთან ბრძოლაა. უტიფარ ხალხთან ლაპარაკს, მთთან მუშტი კრივი სჯობს. მაინც გავარღვევთ", წერს უგულავა.
