ქართული მხარე მზადაა, მალაიზიაში დაკავებულ საქართველოს მოქალაქეებს ადვოკატი დაუქირაოს.
"თუ ჩვენ მოგვეცემა საშუალება, რომ დაკავებულ ქართველებს ქართველი ადვოკატი დავუნიშნოთ, ან საქართველოს მიერ დაქირავებული, ჩვენ ამისთვის მზად ვართ", - განაცხადა საქართველოს საგარეო საქმეთა მინისტრის მოადგილე ნინო კალანდაძემ დღეს გამართულ ტრადიციულ ბრიფინგზე.
მისივე განმარტებით, მიუხედავად იმისა, რომ საქართველოსა და მალაიზიას შორის ექსტრადაციის შესახებ შეთანხმება არ არსებობს, ოფიციალური თბილისი "ყველაფერს გააკეთებს, რომ დაკავებული მოქალაქეების მინიმუმ სამართლებრივი დაცვა მაინც მოხდეს".
"როგორ წარიმართება მალაიზიაში დაკავებული საქართველოს მოქალაქეების ბედი, ჩვენთვის უცნობია, თუმცა უკრაინაში მდებარე ამ ქვეყნის წარმომადგენლობასთან კონტაქტით შევეცდებით ჩვენი მოქალაქეების სამშობლოში ექსტრადაცია თუ არა, მინიმუმ მათი სამართლებრივი დაცვა შევძლოთ", - დასძინა კალანდაძემ.
შეგახსენებთ, რომ დარეჯან კოხტაშვილი და ბაბუცა გორდაძე მალაიზიაში ტურისტული ვიზით თბილისიდან გაემგზავრნენ. სტამბული-მაროკო-კამერუნი-მალაიზია _ ასეთი იყო მარშრუტი. როგორც ისინი აცხადებენ, კამერუნში ჩასვლისას მათ უცნობმა პირმა ტვირთის მალაიზიაში გადატანა სთხოვა.
საქართველოს მოქალაქეების სასამართლო პროცესი მალაიზიაში 3 ნოემბერს, ოთხშაბათს გაიმართება.
