საქართველოს საინჟინრო და ენერგეტიკის აკადემიების ნამდვილი წევრის, ტექნიკის მეცნიერებათა დოქტორის პაატა ცინცაძის განცხადებით, საქართველოში ჰიდროსადგურების მშენებლობას ალტერნატივა არ აქვს.
მისი თქმით, „ნამახვანჰესის“ პროეტის შესახებ არსებული კითხვები ადგილობრივ მოსახლეობასთან კომუნიკაციის ნაკლებობით არის გამოწვეული და თუ ეს შეიცვლება, მხარეებს შორის კომპრომისი აუცილებლად გამოინახება.
“დღეს იყო პირველი ნაბიჯი, მცდელობა იმისა, რომ ეს კომუნიკაცია დამყარებულიყო. ასეთი შეხვედრები უნდა იყოს ბევრი და ხშირად, რათა მოსახლეობას არ გაუჩნდეს ზედმეტი ეჭვები და გაქრეს ის უნდობლობა, რომელიც დღეს არის. გამომდინარე იქიდან, რომ საქართველოს არ გააჩნია ბუნებრივი აირისა და ნავთობის მარაგები, ერთადერთი რესურსი, რითაც შეგვიძლია ვაწარმოოთ ელექტროენერგია, არის ჰიდრორესურსი. ჩვენ მხოლოდ ჰიდრორესურსი გაგვაჩნია, ამიტომ ჰიდროსადგურების მშენებლობას ალტერნატივა არ აქვს.
თბოსადგურების მშენებლობა გამოიწვევს გაზზე დამოკიდებულების ზრდას, ხოლო ელექტროენერგიის იმპორტი გამოიწვევს იმპორტზე დამოკიდებულების ზრდას. ამიტომ უნდა ვაწარმოოთ ჩვენი ელექტროენერგია მხოლოდ ჰიდროსადგურებზე“, - აღნიშნა პაატა ცინცაძემ.
ვფიქრობ, თუ კომუნიკაცია სწორად გაგრძელდება, მხარეები დათმობებზე წავლენ და პროექტი განხორციელდება“, - განაცხადა პაატა ცინცაძემ.
