შეერთებული შტატების პრეზიდენტმა, ჯო ბაიდენმა 1.9-ტრილიონიანი ეკონომიკური დახმარების პაკეტს ხელი მოაწერა.
ხელმოწერის ცერემონიას, რომელიც თეთრ სახლში გაიმართა ვიცე-პრეზიდენტი კამალა ჰარისიც ესწრებოდა.
"ეს ისტორიული კანონპროექტი ქვეყნის ხერხემალს აღადგენს და ბრძოლის შანსს მისცემს ჩვენი ქვეყნის მოქალაქეებს, მშრომელ ხალხს, საშუალო კლასის წარმომადგენლებს, რომლებმაც ეს ქვეყანა ააშენეს", - განაცხადა ბაიდენმა.
კონგრესმა ეკონომიკის სტიმულირების უმსხვილესი ფინანსური პაკეტის საბოლოო ვერსია დღეს დაამტკიცა.
საბოლოოდ დამტკიცებამდე ეკონომიკის სტიმულირების პაკეტმა გრძელი გზა გაიარა, მისი პირვანდელი ვერსია წარმომადგენელთა პალატამ ჯერ კიდევ 27 თებერვალს დაამტკიცა და სენატს გადაუგზავნა განსახილველად. ხანგრძლივი დებატების შემდეგ სენატმა გარკვეული ცვლილებები შეიტანა კანონპროექტში და მხოლოდ ამის შემდეგ დაამტკიცა.
კანონპროექტში შესული ცვლილებების გამო, სენატის მიერ დამტკიცების შემდეგ, იგი კვლავ დაუბრუნდა წარმომადგენელთა პალატას საბოლოოდ დასამტკიცებლად.
სტიმულირების პაკეტი მოიცავს 1400-დოლარიან პირდაპირ ფულად დახმარებას ამერიკელებისთვის, ფულად სახსრებს მცირე ბიზნესებისთვის, პირდაპირ დაფინანსებას შტატებისა და ადგილობრივი მთავრობებისთვის, სკოლებისა და უმაღლესი სასწავლებლების დაფინანსებას და უფრო მეტ თანხას კოვიდტესტირებისა და ვაქცინაციის პროგრამის გაფართოებისთვის.