საპატრიარქოში მოკალათებული ბანდა ვეღარ მართავს ეკლესიას და უფსკრულში მიაქანებს ყოველდღიურად. ასე ეხმიანება დეკანოზი ილია ჭიღლაძე ჭყონდიდის ეპარქიაში განვითარებულ მოვლენებს.
დეკანოზის განცხადებით, ჭყონდიდის მიტროპოლიტი სტეფანე დაუყოვნებლივ უნდა გადააყენონ ეპარქიის მმართველობიდან.
"ძალადობის ხელშეწყობისათვის მიტროპოლიტი სტეფანე, როგორც პასუხისმგებელი შექმნილი უბედურების გამო, დაუყოვნებლივ უნდა იქნეს გადაყენებული ეპარქიის მმართველობიდან.
კიდევ ერთხელ, მოვუწოდებ საქართველოს საპატრიარქოს: ეკლესიაში წარმოქმნილი არნახული კრიზისის და არაკანონიკური მდგომარეობის გამო, დაუყოვნებლივ მოწვეულ იქნეს დიდი საეკლესიო კრება, 1995 წლის უვარგისი, არაკანონიკური ნორმებით სავსე მართვა-გამგების დებულება შეცვლილ იქნეს 1917 წლის ავტოკეფალიის აღმდგენი მამების მიერ დამტკიცებული დებულებით და გადაიჭრას დაგროვილი პრობლემები, რადგან საპატრიარქოში მოკალათებული ბანდა ვეღარ მართავს ეკლესიას და უფსკრულში მიაქანებს ყოველდღიურად!", - წერს დეკანოზი ილია ჭიღლაზე სოციალურ ქსელში.
ჭყონდიდის ეპარქიაში ვითარება მას შემდეგ გამწვავდა, რაც მიტროპოლიტმა სტეფანემ მღვდელმოქმედებაში მონაწილეობა აუკრძალა ეპარქიის ორ დიაკონს. მიტროპოლიტის ამ გადაწყვეტილებამ აღაშფოთა მრევლისა და ეპარქიის სასულიერო პირთა ნაწილი. ისინი მიტროპოლიტის რეზიდენციასთან შეიკრიბნენ, სადაც მეუფე სტეფანე სასულიერო პირებთან კრებას მართავდა.
მრევლი, სასულიერო პირები და ჟურნალისტები ეცადნენ შესულიყვნენ რეზიდენციაში, რის უფლებასაც შიგნით მყოფი ადამიანები არ აძლევდნენ. შეხლაშემოხლის დროს, რეზიდენციის აივნის მოაჯირი ჩამოინგრა და ჟურნალისტები ეზოში გადაცვივდნენ.
მომხდართან დაკავშირებით შინაგან საქმეთა სამინისტრომ გამოძიება დაიწყო.