თბილისში მცხოვრები დევნილებისთვის ფართის დაკანონება და მათი საცხოვრებელ ადგილებით უზრუნველყოფა თბილისის საკრებულოში პოზიციასაა და ოპოზიციას შორის დავის საგანი გახდა.
კობა დავითაშვილმა საკრებულოს თავმჯდომარეს დღის წესრიგში დევნილების შესაბამისი ფართებით უზრუნველყოფისა და გარევაჭრობის მოწესრიგების შესახებ ორი საკითხის შეტანა სთხოვა და განაცხადა, რომ აღნიშნული საკითხების განხილვა ფრაქციების დონეზე უკვე მოხდა, თუმცა ბიუროს სხდომაზე მისი მოთხოვნა არ დაკმაყოფილდა.
როგორც "თავისუფალი დემოკრატების" წარმომადგენელმა ვიქტორ დოლიძემ განაცხადა, ჯანდაცვისა და სოციალური სფერო არის პრიორიტეტი და მთავრობამ ამ მიმართულებით ქმედითი ღონისძიებები უნდა გადადგას. როგორც მან განაცხადა, საკრებულოს მოთხოვნის მიუხედავად, დევნილთა სამინისტროს მათთვის დღემდე არ გადმოუცია ის ბაზა, სადაც მოცემული იქნებოდა ინფორმაცია, თუ რომელი სახლების დაკანონება მოხდება და ზოგადად რა მდგომარეობაში არიან თბილისის მასშტაბით მცხოვრები დევნილები.
"დაგვპირდნენ, რომ სიას მოგვცემდნენ, თუმცა მომივიდა დევნილთა სამინისტროდან განცხადებაზე პასუხი, რომელსაც ხელს ლევან კოკაია აწერს. წერილში ნათქვამია, რომ ბაზაზე მუშაობა ამ დროისთვისაც მიმდინარეობს. ის სრულყოფილი არ არის და ამიტომ ასეთი ბაზა საკრებულოს წევრებს ვერ გადაეცემათ", - განაცხადა ხიდაშელმა.
როგორც ხიდაშელმა განაცხადა, სუბელიანმა რამდენიმე დღის წინ, 7 ოქტომბერს, გააუქმა დევნილთა დახმარებების გაცემის წესი.
დევნილთა დახმარებების გაცემის წესთან დაკავშირებით პოლემიკა გაიმართა თინა ხიდაშელსა და კოკი იონათამიშვილს შორის.
როგორც საკრებულოს უმრავლესობის წევრმა იონათამიშვილმა განაცხადა, მას შემდეგ, რაც ხიდაშელმა პრესკონფერენციაზე გააკეთა განცხადება, რომ დევნილების 28-ლარიანი დახმარება გაუქმდა, მის ტელეფონზე დევნილების მიერ განხორციელებული ზარები არ შეწყვეტილა და ისინი მისგან პასუხს ითხოვდნენ.
"ამ დახმარებებს უკვე ერთი წელია ჯანდაცვის სამინისტრო გასცემს. იურისტი ბრძანდებით და ამის შესახებ ინფორმაცია უნდა გქონოდათ, მაგრამ თქვენ ასეთ ფაქტებს მხოლოდ "პიარისთვის" იყენებთ. იმასაც შეგახსენებთ, რომ დევნილთა სამინისტროსგან გაუგზავნეთ სია და ითხოვდით, დაეზუსტებინათ, ამ ადამიანებს ჰქონდათ თუ არა მიღებული კომპენსაცია. სიაში იყვნენ ისეთი ადამიანებიც, რომლებსაც კომპენსაცია უკვე აღებული ჰქონდათ. თქვენ რომ კარგად გემუშავათ, ასეთი შეცდომა არ მოგივიდოდათ", - განაცხადა ხიდაშელის იონათამიშვილმა.
