საქართველოს მოქალაქეების გერმანიაში დროებით ლეგალურ დასაქმებაზე რეგისტრაცია 15 თებერვლიდან დაიწყო.
დასაქმების ხელშეწყობის სახელმწიფო სააგენტოს ინფორმაციით, 16 თებერვლის მდგომარეობით "დროებითი დასაქმების მსურველი შრომითი მიგრანტის სარეგისტრაციო პორტალზე" დარეგისტრირდა 53 274 პირი, საიდანაც სააპლიკაციო ფორმა "დროებითი დასაქმება გერმანიაში" შეავსო 35 121 პირმა.
გერმანიის შრომის ბაზარზე, საქართველოს მოქალაქეებს დროებითი ლეგალური დასაქმება სამი თვით შეეძლებათ. სეზონური სამუშაოები პირველი აპრილიდან დაიწყება.
დასაქმების ხანგრძლივობა იქნება კვირაში 5-6 დღე, ხოლო დღეში 8-10 საათი.
მინიმალური ანაზღაურება განსაზღვრულია, როგორც საათში 9.5 ევრო (დღევანდელი კურსით 31.33 ლარი). აღსანიშნავია, რომ ამ თანხაში შედის როგორც გადასახადები, ასევე კვებისა და საცხოვრებლის ხარჯები.
ჯანმრთელობის დაზღვევას უზრუნველყოფს დამსაქმებელი კომპანია.
მას შემდეგ, რაც კონკრეტული სამუშაოს მაძიებელი შეირჩევა კონკრეტულ ვაკანსიაზე, რომელსაც აცხადებს გერმანელი დამსაქმებელი, საქართველოს მოქალაქემ, რომელსაც სურს დროებით დასაქმება, საკუთარი ხარჯებით უნდა უზრუნველყოს:
• პასპორტი;
• ჯანმრთელობის ცნობა (ფორმა N100);
• ორმხრივი ავიაბილეთი;
• PCR ტესტის გაკეთება.
გერმანიაში ჩასვლისა და სეზონური სამუშაოს 3-თვიანი პერიოდის გასვლის შემდეგ, საქართველოს მოქალაქე სამშობლოში უნდა დაბრუნდეს.
ამასთან, შეგახსენებთ, დასაქმების მსურველი უნდა აკმაყოფილებდეს შემდეგ მოთხოვნებს:
• 18 წლიდან 60-წლამდე ასაკის საქართველოს მოქალაქე;
• გერმანიაში გამგზავრებამდე სამი თვით ადრე პერიოდში არ უმოგზაურია შენგენის სივრცეში;
• ფიზიკური ჯანმრთელობა;
• მოსავლის აღების სამუშაო გამოცდილება და მოტივაცია;
• ნებისმიერი მიზეზის (დარღვევის) არარსებობა, რაც იწვევს ქვეყანაში ხელახლა შესვლის შეზღუდვას;
• გერმანული ან ინგლისური ენის ელემენტარულ საკომუნიკაციო დონეზე ცოდნა.
რეგისტრაცია შესაძლებელია მთელი წლის განმავლობაში პორტალზე: workabroad.moh.gov.ge.
დროებითი სეზონური დასაქმება საქართველოსა და გერმანიას შორის დადებული შეთანხმების ფარგლებში ხორციელდება.