არ ვაპირებთ, ნიკა მელია უბრძოლველად, უსიტყვოდ, საკუთარი ნებით გავატანოთ და გავრილოვის პატიმრად ვაქციოთ. ამის შესახებ ნაციონალური მოძრაობის წევრმა, თინა ბოკუჩავამ ტელეკომპანია "ფორმულას" ეთერში, გადაცემა "კომენტარში" განაცხადა.
თინა ბოკუჩავას თქმით, ბურთი ახლა "ქართული ოცნების" მოედანზეა.
"არ დაგაჭერინებთ და არ გაგატანთ - ოპოზიციის დღევანდელი შეხვედრისას, პრაქტიკულად ყველა ოპოზიციური ლიდერი საკუთარი სიტყვის დროს ამას იმეორებდა. შინაარსიც ეს არის, რომ არავინ აპირებს, ხარკი გადაუხადოს გავრილოვს ადამიანის თავისუფლების სახით. ყველას ძალიან კარგად გვესმის, რომ თუ ვინმე იყო დასაკავებელი გავრილოვის ღამის სისხლიან მოვლენებთან დაკავშირებით, ეს იყვნენ ის ადამიანები, რომლებიც დღეს უმაღლეს თანამდებობებს იკავებდნენ. ბურთი ახლა ქართული ოცნების მოედანზეა, ჩვენ ვამბობთ უბრალოდ იმას, რომ არ ვაპირებთ, ნიკა მელია უბრძოლველად, უსიტყვოდ, საკუთარი ნებით გავატანოთ და გავრილოვის პატიმრად ვაქციოთ", - თქვა ბოკუჩავამ.
შეგახსენებთ, ნიკა მელიასთვის სადეპუტატო იმუნიტეტის მოხსნის შუამდგომლობით საკანონმდებლო ორგანოს პროკურატურამ უკვე მიმართა. საგამოძიებო უწყებას სადეპუტატო უფლებამოსილების გაუქმება მელიასთვის აღმკვეთი ღონისძიების შესაცვლელად სჭირდება. მმართველმა გუნდმა განაცხადა, რომ მზად არის, იმუნიტეტის მოხსნას მხარი დაუჭიროს.