„ნაციონალური მოძრაობის” მიმართ ჩემი მკვეთრად უარყოფითი დამოკიდებულების მიუხედავად, ვთვლი, რომ ნიკა მელიას მიმართ ეს წმინდა პოლიტიკური ხასიათის ზეწოლაა, აცხადებს პარლამენტის ვიცე-სპიკერი, პარტია „მოქალაქეების“ წევრი ლევან იოსელიანი.
ლევან იოსელიანი ამბობს, რომ საქმეს 20 ივნისის კონტექსტში უყურებს.
"თქვენ იცით, რომ ბესიკ თამლიანის ადვოკატი ვიყავი, ამ საქმეების შინაარსა და მტკიცებულებებს ვიცნობ. პრაქტიკულად, ყველა საქმე ერთი და იგივეა. მტკიცებულებების თვალსაზრისით, ბესიკ თამლიანის საქმისგან მელიას საქმე არაფრით განსხვავდება. ეს საქმეები ვერ ამტკიცებს ამ ადამიანების ბრალეულობას, რაშიც ედავებიან.
„ნაციონალური მოძრაობის” მიმართ ჩემი მკვეთრად უარყოფითი დამოკიდებულების მიუხედავად, ვთვლი, რომ ნიკა მელიას მიმართ ეს წმინდა პოლიტიკური ხასიათის ზეწოლაა. თუ პარლამენტში მისთვის იმუნიტეტის მოხსნის თაობაზე საკითხი შემოვა, ჩემს კოლეგებს მოვუწოდებ, ეს არ გააკეთონ, რადგან არ იქნება სწორი. ნიკა მელიას ხილვას გარეთ ვისურვებდი, ვიდრე ციხეში. მირჩევნია, ის იყოს გარეთ და იმის კეთება გააგრძელოს, რასაც აკეთებს. მას პიროვნულად ვიცნობ და ძალიან არ მემეტება ციხისთვის. ვისურვებდი, გირაო გადაიხადოს, მაგრამ მისი გადასაწყვეტია. ეს ყველაფერი რომ პოლიტიკურად მოტივირებულია, ეჭვი არ მეპარება“, - განაცხადა ლევან იოსელიანმა.
