ევროპული საქართველოს წევრი, ლევან თარხნიშვილი, კულტურის სამინისტროს განათლებისა და სპორტის სამინისტროსაგან გამოყოფას ეხმაურება.
თარხნიშვილის თქმით, ამ სამინისტოების გაერთიანებითაც არაფერი არ შეცვლილა და ახლა, მათი კვლავ გამოყოფა არაფერ შედეგს არ მოიტანს, გარდა იმისა, რომ ქართული ოცნება დაასაქმებს კონკრეტულ ადამიანებს აღნიშნულ სამინისტროში.
„ეს არის ის შემთხვევა, რასაც ჩვენ გვასწავლიდნენ ყველას სკოლაში, რომ შესაკრებთა გადანაცვლებით ჯამი არ იცვლება. არც შეერთებით არ შეცვლილა რამე, რადგან შეერთების აზრი ერთ-ერთი იყო ის, რომ უნდა გადასულიყვნენ მცირე მთავრობაზე, რაც არ მოხდა, რადგან დარჩა ფაქტობრივად იგივე საშტატო ერთეულები, რაც იყო, საქმიანობით ისედაც არაფერს არ აკეთებდნენ და შეერთების შემდეგაც დიდი არაფრით არ გამოირჩეოდნენ, ახლაც შეგვიძლია ვივარაუდოთ, რომ გაყოფა ხდება იმის გამო, რომ კონკრეტული ადამიანები დასაქმდნენ და შესაბამისად, აქედანაც დიდ შედეგებს არ უნდა მოველოდეთ.
სამწუხაროდ, ქართული ოცნება მხოლოდ თავის თავზე ფიქრობს და არა ხალხის გაჭირვებაზე და ადამიანების პრობლემების მოგვარებაზე.“ - განაცხადა თარხნიშვილმა.
