საგარეო საქმეთა სამინისტროსთან საოკუპაციო რეჟიმის მიერ საქართველოს მოქალაქის, ზაზა გახელაძისთვის 12-წლიანი პატიმრობის მისჯას, აპროტესტებენ. სამოქალაქო აქტივისტები ხელისუფლებას უმოქმედობაში ადანაშაულებენ და აცხადებენ, რომ მთავრობამ მოქალაქეებზე ზრუნვა უნდა დაიწყოს.
აქციის ერთერთი მონაწილე გიგა მაქარაშვილი საგარეო უწყებას უპასუხისმგებლობა ქმედებებში ადანაშაულებს. აქტივისტმა ხელისუფლებას რუსეთის პრეზიდენტზე, ვლადიმერ პუტინზე "მიბმული მონები" უწოდა.
"ეს არის არაფრის კეთება ამ უწყების მხრიდან, რომელიც არის კიდევ ერთი სახე ქართული ოცნების, როგორ შეიძლება რომ შენი ქვეყნის მოქალაქეს ოკუპირებულ ტერიტორიაზე 12 წლით პატიმრობაში უშვებდნენ და ვერაფერს აკეთებდე?! არაფერს აკეთებენ, იმიტომ რომ მონები არიან, პუტინზე მიბმული მონები. პუტინმა რომ უთხრას, კიდევ 20 ათასი კაცი გამოუშვი და 100-100 წელი უნდა მივცე, გაუშვებენ, პრობლემა არ აქვთ, რადგან ესენი არიან მონები და მონების დრო ამ ქვეყანაში აღარ არის", - განაცხადა გიგა მაქარაშვილმა.
დღეს, 5 თებერვალს ოკუპირებულ ცხინვალში დაკავებულ ზაზა გახელაძეს ე.წ. სასამართლომ 12 წელი და 6 თვე მიუსაჯეს. საოკუპაციო რეჟიმის ე.წ სასამართლო მას ე.წ სამართალდამცველის სიცოცხლის ხელყოფის მცდელობასაც ედავებოდა.
საქართველოს მოქალაქე გასული წლის 11 ივლისს, ქართული მხარის მიერ კონტროლირებადი ტერიტორიიდან, სხვილოს ციხესთან მდებარე ველიდან გაიტაცეს, იქამდე კი დაჭრეს.
გადაწყვეტილებას გამოეხმაურა სახელმწიფო უსაფრთხოების სამსახურიც. მათი განცხადებით, ე.წ. სასამართლოს უკანონო გადაწყვეტილებამ კიდევ ერთხელ წარმოაჩინა ოკუპაციის თანმდევი პროცესების ანტიჰუმანური და დანაშაულებრივი არსი.
