საპარლამენტო უმრავლესობა ოპოზიციონერ დეპუტატებს მანდატებს არ შეუწყვეტს. ამის შესახებ "ქართული ოცნების" ცენტრალურ ოფისში გამართულ ბრიფინგზე, უმრავლესობის ლიდერმა, ირაკლი კობახიძემ განაცხადა.
"დღეს, ხანგრძლივი დისკუსიის შემდეგ, საპარლამენტო უმრავლესობამ მიიღო გადაწყვეტილება, ამ ეტაპზე ოპოზიციის წარდგენით არჩეული 51 დეპუტატისთვის საპარლამენტო მანდატების შეწყვეტისგან თავის შეკავების თაობაზე. "ქართული ოცნების" ეს პრაგმატული გადაწყვეტილება, დაეფუძნა რამდენიმე ძირითად მოსაზრებას, მათ შორის რადიკალური ოპოზიცია პროცედურული ინსტრუმენტების გამოყენებით ცდილობს განახორციელოს ის, რასაც ჩვენ ვუწოდებდით პარლამენტის საბოტაჟს", - განაცხადა უმრავლესობის სხდომის დასრულების შემდეგ, "ქართული ოცნების" ოფისში გამართულ ბრიფინგზე, პარტიის თავმჯდომარე ირაკლი კობახიძემ.
მისივე თქმით, „ქართულ ოცნებას“ აქვს მანევრირების ძალიან დიდი რესურსი, მაშინ, როდესაც რადიკალურ ოპოზიციას აქვს მხოლოდ ორი არჩევანი: პარლამენტში შესვლა ან არშესვლა.
"ჩვენ ამ დეპუტატებს მივეცით კიდევ ერთი შესაძლებლობა, პატივი სცენ მათი მხარდამჭერების ნებას, რომელთა ორი მესამედი, როგორც ეს უკანასკნელმა სოციოლოგიურმა კვლევებმა აჩვენა, მათი ფავორიტი პარტიების პარლამენტში შესვლის მომხრეა;
გარდა ამისა, ჩვენ გავითვალისწინეთ ჩვენი საერთაშორისო პარტნიორების დამოკიდებულება საკითხისადმი, რომელიც რადიკალური ოპოზიციისთვის კონსტრუქციულ რელსებზე გადასვლის კიდევ ერთი შანსის მიცემისკენ იხრება“, – განაცხადა ირაკლი კობახიძემ და აღნიშნა, რომ მმართველ პარტიას აქვს ინფორმაცია, რომ 20-მდე ოპოზიციონერ დეპუტატს სურს პარლამენტში შესვლა.
„ბოლოს, გვაქვს ინფორმაცია, რომ დამატებით 20-მდე ოპოზიციონერ დეპუტატს სურს პარლამენტში შემოსვლა, თუმცა, შანტაჟისა და ბულინგის გამო ვერ ახერხებენ დღემდე ამ ნაბიჯის გადადგმას. შესაბამისად, მიზანშეწონილად მიგვაჩნია, ამ დეპუტატებს მივცეთ საპარლამენტო მანდატების შენარჩუნების კიდევ ერთი შესაძლებლობა.
ხაზგასმით გვინდა აღვნიშნოთ, რომ დღევანდელი გადაწყვეტილება არ ნიშნავს ჩვენი და ჩვენი მხარდამჭერების დამოკიდებულების ცვლილებას რადიკალური ოპოზიციის მიმართ. ჩვენი პოზიცია უცვლელია იმასთან დაკავშირებით, რომ ოპოზიციის რადიკალური ნაწილის მონაწილეობა საპარლამენტო და პოლიტიკურ პროცესებში ასრულებს თვისებრივად უარყოფით და კონტრპროდუქტიულ როლს ჩვენი ქვეყნის დემოკრატიული განვითარებისათვის. თუმცა, ზემოთ ჩამოთვლილ მოსაზრებებზე დაყრდნობით, ჩვენ დღეს მათთვის საპარლამენტო მანდატების შეწყვეტისგან შევიკავებთ თავს.
კიდევ ერთხელ აღვნიშნავთ, რომ „ქართულ ოცნებას“ აქვს მანევრირების ძალიან დიდი რესურსი, მაშინ, როდესაც რადიკალურ ოპოზიციას აქვს მხოლოდ ორი არჩევანი: პარლამენტში შესვლა ან არშესვლა. გვესმის, რომ ორივე არჩევანი მათთვის რთული და პრობლემურია, თუმცა, შეგახსენებთ, რომ ამ მდგომარეობაში მათ თავისივე არასწორი ქმედებებით ჩაიყენეს თავი“, – განაცხადა ირაკლი კობახიძემ.
51 ოპოზიციონერი დეპუტატის უფლებამოსილების შეწყვეტასთან დაკავშირებით პარლამენტის საპროცედურო საკითხთა კომიტეტმა უკვე იმსჯელა და მხარი დაუჭირა.
პარლამენტის რეგლამენტის თანახმად, საკითხი პლენარულ სხდომაზე უნდა გავიდეს, სადაც დეპუტატთა უფლებამოსილების შეწყვეტას 50 ხმა სჭირდება.
ოპოზიციონერმა დეპუტატებმა პარლამენტს ბოიკოტი მას შემდეგ გამოუცხადეს, რაც უარი თქვეს საპარლამენტო არჩევნების შედეგების აღიარებაზე. ოპოზიციამ უფლებამოსილების შეწყვეტის შესახებ პარლამენტს გასული წლის დეკემბერში მიმართა.
პარლამენტმა უკვე შეუწყვიტა უფლებამოსილება „პატრიოტთა ალიანსის“ სამ წევრს - ირმა ინაშვილშ, გიორგი ლომიასა და გოჩა თევდორაძეს.
