ფარმაცევტული კომპანია Moderna-ს კორონავირუსის საწინააღმდეგო ვაქცინა ეფექტურობას ავლენს ვირუსის სხვა შტამების მიმართ, მათ შორის დიდ ბრიტანეთსა და სამხრეთ აფრიკაში აღმოჩენილი შტამების მიმართ. ინფორმაციას BBC-ი ფარმაცევტული კომპანიის მეცნიერთა გუნდის განცხადებაზე დაყრდნობით ავრცელებს.
წინასწარი ლაბორატორიული კვლევების შედეგების თანახმად, ვაქცინით გამომუშავებულ ანტისხეულებს შეუძლიათ ადამიანის ორგანიზმში ვირუსის ახალი შტამების ამოცნობა და მათ წინააღმდეგ ბრძოლა.
გავრცელებული ცნობით, აღნიშნული კვლევისთვის გამოიყენეს 8 ადამიანის სისხლის ნიმუშები, რომელთაც მიღებული ჰქონდათ Moderna-ს ვაქცინის ორივე დოზა.
კორონავირუსის ახალი შტამები, განსაკუთრებით კი ბრიტანეთში აღმოჩენილი შტამი, ვირუსის სტანდარტულ ვარიანტზე გაცილებით სწრაფი გავრცელების უნარით გამოირჩევა.
ექსპერტების აზრით, ბრიტანეთში აღმოჩენილი ვარიანტი 70%-ით უფრო სწრაფად ვრცელდება.
კორონავირუსის საწინააღმდეგო ვაქცინები შემუშავებული იყო ვირუსის თავდაპირველი ვარიანტების წინააღმდეგ, მაგრამ მეცნიერები თვლიან, რომ ისინი ახალ შტამებსაც უმკლავდებიან.
