ივერი მელაშვილსა და ნატალია ილიჩოვას დღეს ბრალს დაუზუსტებენ. როგორც ადვოკატი განმარტავს, ბრალდებულებს კვალიფიკაციას არ შეუცვლიან და ბრალის ფორმულირებაში გარკვეულ ცვლილებებს შეიტანენ.
შეგახსენებთ, რომ 2020 წლის ოქტომბერში მთავარმა პროკურატურამ დავით გარეჯის საზღვრის დამდგენი კომისიის ხელმძღვანელი, ივერი მელაშვილი და კომისიის წევრი, ნატალია ილიჩოვა დააკავა.
გამოძიება მათ საქართველოს საწინააღმდეგო მოქმედებას ედავება. პროკურატურა ამტკიცებს, რომ დაკავებულებმა საზღვარი ჩვენი ქვეყნის საზიანოდ მონიშნეს და "საქართველოს ტერიტორიის ნაწილი უცხო ქვეყანას გადასცეს".
გამოძიება 17 აგვისტოს დაიწყო, ის სისხლის სამართლის კოდექსის 308-ე მუხლის პირველი ნაწილით მიმდინარეობს და სასჯელის ზომად ათიდან თხუთმეტ წლამდე თავისუფლების აღკვეთას ითვალისწინებს.