სიმართლე არ დაიმალება. მათ არ უნდათ, რომ შეთანხება შედგეს, აცხადებს „მოქალაქეების“ წარმომადგენელი ლევან იოსელიანი „ევროპულ საქართველოზე“ საუბრისას. მისი განმარტებით, დაახლოებით ორი თვის წინ რაზეც დავიწყეთ საუბარი, ის დაადასტურა კიდევ ერთხელ „გირჩის“ წარმომადგენელმა, იაგო ხვიჩიამ, რომ მართლა არიან პარტიაში ადამიანები, რომლებიც არ არიან დაინტერესებული, შედგეს შეთანხება.
„ჩვენ დავინახეთ ერთი კონკრეტული პარტიის ძალიან აქტიური პოზიცია ამ მიმართულებით. გამოვედით და ამის შესახებ ხმამაღლა დავიწყეთ საუბარი. ამის გამო, ათასი სიბინძურე დაგვაბრალეს, გამყიდველობა, მოღალატეობა, მაგრამ დამტკიცდა, რომ ეს ასე ყოფილა. სიმართლე არ დაიმალება. მათ არ უნდათ, რომ შეთანხება შედგეს; არ უნდათ, რომ ოპოზიციამ მიაღწიოს ხელისუფლებასთან რაიმე ტიპის შეთანხმებას და შევიდეს პარლამენტში. ეს იმიტომ, რომ მათი ლიდერები ვერ მოხვდნენ პარლამენტში და ყველანი არიან უმანდატოდ დარჩენილი.
ადამიანები ყველაფერს აკეთებდნენ, ისე პოზიციონირებდნენ, მათი გამოსვლები შინაარსობრივად იყო მიმართული იქითკენ, რომ შეთანხება არ და ვერ ყოფილიყო მიღწეული. ფაქტია, რომ სხვა პარტიებიც იზიარებენ იმ მოსაზრებას და არგუმენტებს, რასაც თავის დროზე ეს პარტია აყალიბებდა, გიგა ბოკერია, გიგი უგულავა – ეს ადამიანები დადიოდნენ შეხვედრებზე, სხვა ჩვენ იქ არ გვინახავს. პარლამენტში შესვლა-არშესვლა საბოლოოდ დამოკიდებული არის იმაზე, როგორ დასრულდება ჩვენ შორის მოლაპარაკება, შეთანხმებით თუ შეთანხმების გარეშე“, - აცხადებს ლევან იოსელიანი.
