"გირჩი - მეტი თავისუფლება" მთავრობას მოუწოდებს დაუყოვნებლივ გაიხსნას ქვეყანა და გაუქმდეს ყველა შეზღუდვა, რაც ეხება თავისუფალ გადაადგილებასა და ნებისმიერ ეკონომიკურ საქმიანობას.
ამის შესახებ პარტიამ განცხადება თავის Facebook-ის გვერდზე გაავრცელა.
"რადგან საქართველოს დე ფაქტო ხელისუფლება არ აპირებს გონზე მოსვლას, ჩვენ მოვითხოვთ: დაუყოვნებლივ გაუქმდეს ყველა სახის შეზღუდვა, რომელიც ეხება ადამიანების თავისუფალ გადაადგილებასა და ნებისმიერ ეკონომიკურ საქმიანობას; დაუყოვნებლივ გაიხსნას ქვეყანა და აღდგეს ყველა სახის სატრანსპორტო მიმოსვლა სხვა ქვეყნებთან. ჩვენ არ ვაპირებთ შევეგუოთ მონურ მდგომარეობას და ყველა გზას გამოვიყენებთ, რომ დავიცვათ ჩვენი თავისუფლება და ჩვენი შვილების მომავალი"
პარტიის განცხადებაში ასევე ნათქვამია, რომ "გაზაფხულიდან გატარებული ვითომ ვირუსის შემაკავებელი ღონისძიებები" მთავრობამ პოლიტიკური მიზნებით გამოიყენა:
“დღეს აღარ არსებობს ქვეყანაში საღი აზრის მქონე ადამიანი, რომელსაც კიდევ სჯერა, რომ გზების მორეცხვა, ბლოკ-პოსტების მოწყობა სამხედროებით, სხეულის ტემპერატურის რეგულარული ზომვა ქალაქის ქუჩებსა და რაიონებში, ავტომობილში ერთი ოჯახის წევრებისთვის ერთად ჯდომის აკრძალვა, სოფლებისა და რაიონების ჩაკეტვა და შემდეგ მაკარონითა და ზეთით მომარაგება, სუფთა ჰაერზე სეირნობის აკრძალვა და სხვ., რაიმე კავშირში შეიძლება იყოს ჰაერ-წვეთოვანი გზით გადამდები ვირუსის გავრცელების შეკავებასთან.
ერთადერთი, რაც ამ ყველაფერმა მოგვიტანა, ესაა დამონებული და სახლში გამოკეტილი უამრავი მოქალაქე, რომელთაც დაკარგეს სამსახურები, დაუხურეს სიმწრით ნაკოწიწები ბიზნესები, დაკარგეს ან შეუმცირდათ შემოსავლები, გაეზარდათ ვალები ან ვეღარ ახერხებენ არსებული ვალების მომსახურებას, დაემსხვრათ ცხოვრების გეგმები და დაენგრათ ოჯახები და, რაც ყველაზე მნიშვნელოვანია, ვისაც დღემდე არავინ ეუბნება, როდის შეიძლება დასრულდეს ეს საგიჟეთი და როდიდან შესძლებენ დაუბრუნდნენ ნორმალურ ცხოვრებას", - ნათქვამია განცხადებაში.
"გირჩი - მეტი თავისუფლება" ამბობს, რომ შრომა და სპორტული აქტივობების აკრძალვა არასამართლიანია და ასეთ აქტივობაში ჩართულ ადამიანებს სახელმწიფო ექცევა, როგორც "ბანდიტებს" და "ტერორისტებს".ნამდვილ კრიმინალს კი მთავრობის მხრიდან, "გირჩის" შეფასებთ, სრული კარტ-ბლანში აქვს.
შრომა, გართობა და სპორტული აქტივობა არ არის კრიმინალი! და მიუხედავად ამისა, ქართული პოლიცია, ისევე, როგორც ჯანდაცვის სამინისტროს შრომის უსაფრთხოების დეპარტამენტი ასეთ აქტივობებში ჩართულ ადამიანებს ექცევა ისე, როგორც ბანდიტებსა და ტერორისტებს: უვარდება ობიექტებზე, ატარებს აბსურდულ სპეცოპერაციებს, აწარმოებს უშინაარსო საგამოძიებო პროცედურებს და ნაცვლად იმისა, რომ ვინმე ამაზე ბოდიშს იხდიდეს, პირიქით, სატელევიზიო სიუჟეტებს ქმნიან, თუ როგორ ეფექტურად აღკვეთეს კრიმინალი. ეს ყველაფერი იმ ფონზე, როცა რეალურ ბანდიტებს სრული კარტ-ბლანში აქვთ მიცემული", - წერია პარტიის განცხადებაში.
პარტიაში თვლიან, რომ თუ ქვეყანაში გაგრძელდება შეზღუდვები არსებული მძიმე ეკონომიკური მდგომარეობა კიდევ უფრო გაუარესდება.
ჩვენთვის, ისევე, როგორც ნებისმიერი ადამიანისთვის, ვისაც ესმის ეკონომიკის ელემენტარული პრინციპები, ცალსახაა, რომ ასე გაგრძელება ნიშნავს ეკონომიკის კიდევ უფრო დამუხრუჭებას, ახალი, უზარმაზარი ვალების აღებას, რომლებიც ჩვენმა შვილებმა უნდა იხადონ, გაზრდილ გადასახადებს, გაზრდილ საბიუჯეტო დეფიციტს, ნაკლებ ინვესტიციებსა და კიდევ უფრო შენელებულ ეკონომიკურ განვითარებას და, საბოლოო ჯამში, სიღარიბეში კიდევ უფრო და დიდი ხნით ჩაძირვას", - წერია განცხადებაში.