თბილისში, ზემო ფონიჭალაში მდებარე სკვერში მოქანდაკე ირაკლი წულაძის ნამუშევარი - "ოკუპაციის მსხვერპლთა ხსოვნის მემორიალი" განთავსდა.
2,40 მეტრი სიმაღლის 4,20-მეტრიანი ნაწრთობი შუშის კედლის სხვადასხვა მხარეს ქალი და მამაკაცი დგას. შუშის კედელზე გრავირებული მავთულხლართები კი მათ მიახლოების საშუალებას არ აძლევს.
მოქანდაკე ირაკლი წულაძე "ჯი-ეიჩ-ენთან" საუბარში ამბობს, რომ ამ თემაზე მუშაობა მისთვის ემოციურიც იყო და საინტერესოც - "მინდოდა, განხვავებული ყოფილიყო".
"ჩემი აზრით, განსხვავებული მემორიალია. ორი ადამიანი დგას ფიქტიური საზღვრის სხვადასხვა მხარეს. ქალი და კაცი, როგორც საწყისი. ეს მხოლოდ ოკუპაცია არ არის, გლობალური თემაა, სიყვარულის განცალკევების, რომელსაც უხილავი კედელი და მავთულხლართები აჩენს. ალეგორიული ხასიათის ნამუშევარია. ჩვენი ქვეყნისთვის ეს მნიშვნელოვანია და მეტად ემოციური. ვეცადე, შუშის კედელით გადმომეცა ის მდგომარეობა, რომელიც არის - კედელი, რომელიც არ ჩანს, მაგრამ სინამდვილეში არის", - აცხადებს "ჯი-ეიჩ-ენთან" საუბარში ირაკლი წულაძე და აღნიშნავს, რომ მისთვის სასიამოვნოა, როდესაც, არა მხოლოდ კოლეგებს, არამედ, მისთვის უცნობ ადამიანებს ნამუშავერი მოეწონათ.
"სასიამოვნოა, რომ ადამიანებს მოეწონათ. ეს მახარებს. სოციალურ ქსელებში დადებითი, პოზოტიური გამოხმაურება მოჰყვა. ბევრი მეკითხება, რატომ განთავსდა ზემო ფონიჭალაში და არა ქალაქის ცენტრში, ან მაგალითად, გორში. იქ იმიტომ განთავსდა, რომ ტერიტორია თბილისის მერიამ შეარჩია, რადგან სკვერს, სადაც მემორიალი განთავსდა, ოკუპაციის სკვერი ჰქვია", - გვითხრა წულაძემ.
თბილისის მერიამ მემორიალის შესაქმნელად კონკურსი 2019 წლის 3 აპრილს გამოაცხადა, თუმცა 3 აპრილს გამოცხადებულ კონკურსში წარმოდგენილი წინადადებიდან, გამარჯვებული არ გამოვლინდა. შესაბამისად, 2019 წლის 18 ივლისს ხელახალი კონკურსი გამოცხადდა. კონკურსში გამარჯვებული კი ირაკლი წულაძე გახდა.
მემორიალის კომპოზიცია შედგება ნატურალური ზომის, ბრინჯაოს ორი ფიგურისგან და მათ შორის აღმართული ნაწრთობი, მრავალშრიანი მინის კედლისგან, სადაც დამონტაჟებულია მინათების სისტემა. კედელი გრავირებულია და მასზე სიმბოლურად მავთულხლართებია დატანილი.
ფოტოები: ალექსეი სეროვი