თბილისის მეტროპოლიტენი 55 წლისაა. ათწლეულების განმავლობაში ის ერთგულად ემსახურება დედაქალაქის მაცხოვრებლებსა და მის სტუმრებს.
1951 წელს საბჭოთა კავშირის მინისტრთა საბჭომ მიიღო გადაწყვეტილება, თბილისში მეტროპოლიტენის მშენებლობასთან დაკავშირებით.
1966 წლის 11 იანვარს, მგზავრებმა პირველად ისარგებლეს თბილისის მეტროპოლიტენის მომსახურებით, რომელიც იმ პერიოდში 6,3 კმ-იან სატრანსპორტო ხაზს აერთიანებდა: "დიდუბე", "ვაგზლის მოედანი", "მარჯანიშვილი" და "რუსთაველი".
თბილისის სატრანსპორტო სქემის მიხედვით, იგეგმებოდა მეტროპოლიტენის რამდენიმე ახალი ხაზისა და სადგურის მშენებლობა, სადაც სადგურები "დიდუბე-2", "ტექნიკური უნივერსიტეტი-2" და "ვარკეთილი-2" გადასასვლელი სადგურები იქნებოდნენ.
1992 წელს ქვეყნის დამოუკიდებლობის მოპოვების შემდეგ, შექმნილი ეკონომიკური მდგომარეობის გამო, მეტროპოლიტენის განვითარების სქემა შეჩერდა და მხოლოდ, 2000 წელს განხორციელდა საბურთალოს ხაზზე, ცალ ლიანდაგზე მოძრაობით, სადგურის - "ვაჟა-ფშაველა" ამოქმედება.
2015 წლიდან განახლდა მეტროპოლიტენი საბურთალოს ხაზის სადგურის - "უნივერსიტეტი" მშენებლობა, რომელიც დასრულდა 2017 წელს.
აზიის განვითარების ბანკის (ADB) ფინანსური მხარდაჭერით, თბილისის მეტროპოლიტენში ინფრასტრუქტურული სამუშაოები განხორციელდა: 55 წლის მანძილზე პირველად, სრულად განახლდა საკაბელო და სავენტილაციო ინფრასტრუქტურა; შეიცვალა 191, 000 მეტრი დაბალი ძაბვის (220-380 ვოლტი) და 137,000 მეტრის საშუალო ძაბვის (6-10 კილოვოლტის) ახალი კაბელი და დამონტაჟდა 32 ერთეული ახალი სავენტილაციო დანადგარი.
მნიშვნელოვნად გაიზარდა უსაფრთხოების პარამეტრები და შემცირდა ტექნიკური შეფერხებების რაოდენობა.
ევროპის რეკონსტრუქციის განვითარების ბანკის (EBRD) მხარდაჭერით, მიმდინარეობს ტენდერი მეტროს 40 ახალი ვაგონის (ათი ოთხვაგონიანი შემადგენლობა) შესყიდვასთან დაკავშირებით. დაგეგმილია მეტროს დეპოს, მეტროს პირველი და მეორე ხაზების დამაკავშირებელი გვირაბის, თბილისის 10 მეტროსადგურის რეაბლიტაცია.
2021 წელს აზიის განვითარების ბანკის მხარდაჭერით, სააგენტო აგრძელებს მეტროს უნივერსალური მისაწვდომობის მიზანშეწონილობის კვლევებს, რომელიც შეეხება ყველა, 23-ვე სადგურს და ასევე ითვალისწინებს მ/ს-ების "ახმეტელის თეატრი", "მარჯანიშვილი", "თავისუფლების მოედანი" მეორე ამოსასვლელების დამატებას.