"ქართული ოცნების" აღმასრულებელმა მდივანმა ირაკლი კობახიძემ, არჩევნების გაყალბებასთან დაკავშირებით სიმართლის დადგენის მიზნით, პარლამენტში საგამოძიებო კომისიის შექმნა თებერვლის პირველ კვირაში დააანონსა.
მან კიდევ ერთხელ შესთავაზა ოპოზიციურ პარტიებს ჩაერთონ საპარლამენტო საქმიანობაში და მონაწილეობა მიიღონ კომისიის მუშაობაში. ასევე, ხაზი გაუსვა, რომ კომისიაში მოწვეული იქნებიან ადგილობრივი და საერთაშორისო სადამკვირვებლო ორგანიზაციები, მათ შორის, ეუთო/ოდირი.
"კიდევ ერთხელ ვთავაზობთ საპარლამენტო პარტიებს, ჩაერთონ საპარლამენტო მუშაობაში და ჩაერთონ საგამოძიებო კომისიის საქმიანობაში, რათა ნათელი მოვფინოთ სიმართლეს არჩევნებთან დაკავშირებით, გადავამოწმოთ იმდენი საარჩევნო უბნის მონაცემები რამდენიც საჭიროდ ჩაითვლება ამ სიმართლის დასადგენად. საგამოძიებო კომისიაში შეიქმნება თებერვლის პირველივე კვირაში და მის მუშაობაში მონაწილეობის მისაღებად მოვიწვევთ ყველა საერთაშორისო და ადგილობრივ სადამკვირვებლო ორგანიზაციას, მათ შორის ეუთო/ოდირს, რათა უზრუნველყოფილი იყოს კომისიის მუშაობის მაქსიმალური ინკლუზიურობა და გამჭვირვალობა.
ამასთან, ძალაში რჩება ჩვენი პირობა, რომ თუნდაც 1%-იანი გადახრის აღმოჩენის შემთხვევაში, მმართველი პარტია დაუყოვნებლივ დანიშნავს რიგგარეშე საპარლამენტო არჩევნებს, პირადადად მე კი, როგორც "ქართული ოცნების" საარჩევნო შტაბის ხელმძღვანელი ჩამოვშორდები პოლიტიკურ საქმიანობას“, - განაცხადა ირაკლი კობახიძემ.
