საქართველოს მესამე პრეზიდენტი მიხეილ სააკაშვილი ნიკა მელიას "ნაციონალური მოძრაობის" თავმჯდომარედ არჩევას ულოცავს. ამის შესახებ სააკაშვილი სოციალურ ქსელში წერს.
ვულოცავ უმაგრეს ლიდერს ნიკა მელიას - "ნაციონალური მოძრაობის" თავჯდომარედ პირველ ელექტრონულ კენჭისყრაში არჩევას. უახლოეს პერიოდში, როგორც კი შეიცვლება ივანიშვილის უზურპატორი დიქტატურა. ჩვენ მოვახდენთ ინიცირებას, ყველა გადაწყვეტილების ფართო დემოკრატიული ბაზით - ელექტრონულად კენჭისყრით მიღების და ეს იყო ამის პირველი მშვენიერი გამოცდილება.
ასევე მინდა ვთქვა, რომ ლევან ვარშალომიძე, რომელიც არის ჩემი უძველესი მეგობარი და თანამებრძოლი, რჩება ერთ-ერთ მთავარ ლიდერად წინააღმდეგობის მოძრაობის, ისევე როგორც დარწმუნებული ვარ, იქნება ძალიან მნიშვნელოვანი ფიგურა - საქართველოს შემდგომ ხელისუფლებაში. დიდი მადლობა ლევანს, ამ არჩევნების ღირსეულად ჩატარებისთვის და მტკიცე ერთიანობის გამოვლენისთვის. დიდი მადლობა,
ყველა მონაწილეს კენჭისყრაში. ძალიან ბევრი მონაწილე იყო, ბევრმა თავი შეიკავა იმიტომ, რომ ბევრი ორივე კანდიდატს უჭერდა მხარს და ესეც გასაგებია, მაგრამ ჩართულობის ხარისხი იყო ძალიან მაღალი და ეს ძალიან მახარებს", - წერს სააკაშვილი.
დღეს გაიმართება "ერთიანი ნაციონალური მოძრაობის" პარტიის ყრილობა, სადაც ნიკა მელიას პარტიის თავმჯდომარედ დაამტკიცებენ. მანამდე სოციალურ ქსელ ფეისბუკზე გაიმართა ელექტრონული კენჭისყრა, სადაც ნიკა მელიამ გაიმარჯვა.
ელექტრონულ კენჭისყრაში მონაწილეობა 20 779-მა პირმა მიიღო. ნიკა მელიამ 13 491 ხმა დააგროვა, ხოლო ლევან ვარშალომიძემ - 7 288 ხმა.
ერთიანი ნაციონალური მოძრაობის ყოფილმა თავმჯდომარემ, გრიგოლ ვაშაძემ პარტია 15 დეკემბერს დატოვა. ვაშაძემ განცხადება Facebook-ზე გამოაქვეყნა. ის ენმ-ს დატოვების მიზეზად ასახელებს "პარტიული სტრატეგიის არარსებობას", პარტიის გარშემო და შიგნით "ოდიოზური ფიგურების" გამოჩენას, "ელჩების წინააღმდეგ გაჩაღებული თავდასხმისა და შეურაცხყოფის კამპანიას" და "სხვა პრობლემებს".
