ჩვენ ყოველთვის ვცდილობდით, მოგვეძებნა ბალანსი, ეპიდემიოლოგიურ და ეკონომიკურ ვითარებას შორის. ჩვენ კარგად ვხედავთ, რომ 28 ნოემბრიდან დაწესებული შეზღუდვების შედეგი არის თვალსაჩინო, ვირუსის გავრცელება არის შენელებული და ასევე ვხედავთ, რომ დასტაბილურებულია ეპიდემიოლოგიური ვითარება,-ამის შესახებ ვიცე-პრემიერმა, რეგიონული განვითარებისა და ინფრასტრუქტურის მინისტრმა, მაია ცქიტიშვილმა, უწყებათაშორისი საკოორდინაციო საბჭოს დასრულების შემდეგ, მთავრობის ადმინისტრაციაში გამართულ ბრიფინგზე განაცხადა.
მაია ცქიტიშვილმა ხაზი გაუსვა, რომ ეს არ იძლევა დამშვიდების საფუძველს, ვინაიდან, მაგალითად დღეს, ერთ დღეში, ინტენსიური ტესტირების შედეგად გამოვლენილია 3 064 ინფიცირების შემთხვევა და თითოეულ მოქალაქეს, ასევე ხელისუფლებას, კერძო სექტორს და მთელ საზოგადოებას აკისრია უდიდესი პასუხისმგებლობა, რათა გაუფრთხილდეს იმ შედეგს, რომელიც მიღწეულია და არ მოხდეს ვირუსის გავრცელების სწრაფი ზრდა.
„უწყებათაშორისი საკოორდინაციო საბჭო აქტიურად მსჯელობდა შეზღუდვების შემსუბუქების მიზანშეწონილობაზე. ამ პროცესში ჩართულები იყვნენ, როგორც ბიზნესის წარმომადგენლები, ასევე ეპიდემიოლოგები, ექიმები, რა თქმა უნდა, საკოორდინაციო საბჭო სრული შემადგენლობით. ჩვენ, დღეების განმავლობაში, ვაკვირდებოდით იმ ეპიდემიოლოგიურ ვითარებას, რომელიც გვქონდა, ვაკვირდებოდით შემთხვევების შემცირების დინამიკას და ბუნებრივია, რა თქმა უნდა, ჩვენ, ყველანი ვაკვირდებით იმ ტენდენციებსა და პროცესებს, რომელიც უკლებლივ ყველა ქვეყანაში, რეგიონში, ჩვენს გარშემო მიდის. იცით, რომ ძალიან ბევრი ქვეყანა იღებს ბევრად უფრო მკაცრს გადაწყვეტილებებს საახალწლო პერიოდთან დაკავშირებით, თუმცა ასევე უნდა აღინიშნოს, რომ ჩვენ ყოველთვის ვცდილობდით, მოგვეძებნა ბალანსი, ეპიდემიოლოგიურ და ეკონომიკურ ვითარებას შორის. ჩვენ კარგად ვხედავთ, რომ 28 ნოემბრიდან დაწესებული შეზღუდვების შედეგი არის თვალსაჩინო, ვირუსის გავრცელება არის შენელებული და ასევე ვხედავთ, რომ დასტაბილურებულია ეპიდემიოლოგიური ვითარება, თუმცა რა თქმა უნდა, ეს არ გვაძლევს დამშვიდების საფუძველს, ვინაიდან, მხოლოდ დღეს, ერთ დღეში, ინტენსიური ტესტირების შედეგად გამოვლენილია 3 064 შემთხვევა და საავადმყოფოში, სამწუხაროდ, ჯერ კიდევ მკურნალობს 6 358 მოქალაქე. ამდენად, ვითარება არ არის მარტივი და ჩვენ, რა თქმა უნდა, თითოეულ ჩვენგანს, როგორც მოქალაქეებს, ასევე ხელისუფლებას, კერძო სექტორს და მთლიანად, მთელ საზოგადოებას, გვაკისრია უდიდესი პასუხისმგებლობა, რომ გავუფრთხილდეთ იმ შედეგს, რომელიც უკვე იქნა მიღწეული, არ დავუშვათ ვირუსის გავრცელების სწრაფი ზრდა და გარდა ამისა, რა თქმა უნდა, უნდა გავუფრთხილდეთ ყველა იმ ფასს, რომელსაც ჩვენ ყველანი ვიხდით ამ შეზღუდვების შედეგად“, - განაცხადა ვიცე-პრემიერმა.
