ევროკავშირმა ბელარუსის მოქმედი პრეზიდენტის ალიაქსანდრ ლუკაშენკას რეჟიმის და მისი გარემოცვის წინააღმდეგ სანქციების მესამე პაკეტი დაამტკიცა.
მანამდე დამტკიცებულ სანქცირებულთა სიას კიდევ 29 ფიზიკური პირი და ორგანიზაცია დაემატა.
ევროკავშირის მიერ დაწესებული სანქციების ქვეშ მოექცნენ ბელარუსის პარლამენტის ზედა პალატის სპიკერი ნატალია კოჩანოვა, ვიცე პრემიერ მინისტრი ანატოლი სივაკი და ქვეყნის გენერალური პროკურორი ანდრეი შვედი.
ახალ სიაში შევიდა Belteleradiocompany კომპანიის ხელმძღვანელი ივან ეისმონტი, რომლის მეუღლე - ლუკაშენკას პრესმდივანი ნატალია ეისმონტი უკვე არის ევროკავშირის მიერ მანამდე დაწესებულ სანქცირებულთა სიაში.
ევროკავშირი სანქციები ასევე შეეხო 7 ბელარუსულ კომპანიას, რომლებიც ძირითადად თავდაცვის სფეროში მუშაობენ. სანქციები დაწესებულია აგრეთვე ბელორუსის პრეზიდენტის აპარატის, მინსკის ტრაქტორის ქარხნის, 140-ე სარემონტო ქარხნის, Beltechexport, Sinezis და Dana ჰოლდინგების მიმართ.
ყველა მათგანს ეკრძალება ევროკავშირის ტერიტორიაზე შესვლა, მათი ანგარიშები ევროპულ ბანკებში დაექვემდებარება გაყინვას.
მანამდე ევროკავშირმა უკვე დააკისრა სანქციები 55 ბელარუს მაღალჩინოსანს, რომლებიც სავარაუდოდ პასუხისმგებელნი არიან 9 აგვისტოს ჩატარებულ საპრეზიდენტო არჩევნებსა და სამართალდამცავი ორგანოების მხრიდან მომიტინგეების მიმართ განხორციელებულ ძალადობაზე.
ლუკაშენკა, რომელიც 26 წელია ხელისუფლების სათავეშია, აცხადებს, რომ 9 აგვისტოს საპრეზიდენტო არჩევნებში გაიმარჯვა ხმების 80 პროცენტით. ევროკავშირი არ ცნობს არჩევნების შედეგებს და ლუკაშენკას ლეგიტიმურ პრეზიდენტად არ აღიარებს.