გუშინ, 4 ნოემბერს ევროკავშირის ელჩები შეთანხმდნენ სანქციათა ახალ პაკეტზე ბელარუსის 15 მაღალჩინოსნის, მათ შორის ბელარუსის მოქმედი პრეზიდენტის, ალიაქსანდრ ლუკაშენკოს წინააღმდეგ, რომლებიც პასუხისმგებელნი არიან საპრეზიდენტო არჩევნების გაყალბებასა და საპროტესტო აქციების მონაწილეთა მიმართ ძალადობაზე.
სანქცირების შესახებ გადაწყვეტილება 6 ნოემბერს გამოცხადდება ევროკავშირის ოფიციალურ ჟურნალში.
სანქციები მოიცავს აქტივების გაყინვასა და მგზავრობის აკრძალვას.
ლუკაშენკა, რომელიც 26 წელია ხელისუფლების სათავეშია, აცხადებს, რომ 9 აგვისტოს საპრეზიდენტო არჩევნებში გაიმარჯვა ხმების 80 პროცენტით. ევროკავშირი არ ცნობს არჩევნების შედეგებს და ლუკაშენკას ლეგიტიმურ პრეზიდენტად არ აღიარებს.
გასულ თვეს, ევროკავშირმა ბელარუსის 40 სახელმწიფო მოხელეს დაუწესა სანქციები.
