აჭარის მთავრობის თავმჯდომარის, თორნიკე რიჟვაძის ხელმძღვანელობით, კორონა ვირუსთან დაკავშირებით შექმნილი ოპერატიული შტაბის სხდომა გაიმართა, სადაც აჭარაში არსებული ეპიდემიოლოგიური ვითარება განიხილეს.
რეგიონში ეპიდემიის მართვის თვალსაზრისით სტაბილიზაცია შეინიშნება. ბოლო დღეების განმავლობაში კორონა ვირუსით ინფიცირების კლების ტენდენცია გამოიკვეთა. გასული 24 საათის განმავლობაში კლინიკურად გამოჯანმრთელდა 412 პაციენტი. გამოვლინდა ინფიცირების 212 ახალი შემთხვევა. ჯამში გამოჯანმრთელდა 26 000 - მდე პირი.
სამედიცინო დაწესებულებები და კოვიდ სასტუმროები მზად ყოფნაში არიან პაციენტების მისაღებად. ამ დროის მონაცემებით სტაციონარში არის 222 თავისუფალი საწოლი.
აჭარის ყველა მუნიციპალიტეტს საქართველოს ჯანდაცვის სამინისტროსგან გადაეცა 80-მდე ერთეული ჟანგბადის კონცენტრატორი. აღნიშნული პროცესი გრძელდება, რაც ხელს შეუწყობს პაციენტებისთვის სამედიცინო სერვისის შეუფერხებლად მიწოდებას.
