ოპოზიციური პარტიები მე-10 მოწვევის პარლამენტის პირველი სხდომის პარალელურად შეიკრიბნენ "პირველი რესპუბლიკის პარკში", სადაც ხელმოწერით დაადასტურეს თავიანთი გადაწყვეტილება საპარლამენტო მანდატებზე უარის თქმისა და ბოიკოტის რეჟიმის შესახებ.
"ჩვენ, 2020 წლის 31 ოქტომბრის არჩევნების ცესკო-ს შედეგების მიხედვით საქართველოს პარლამენტში არჩეული დეპუტატები, უარს ვაცხადებთ სადეპუტატო მანდატებზე და ვტოვებთ გაყალბებული არჩევნების შედეგების მიხედვით შეკრებილ პარლამენტს, რადგან ის არ ასახავს ქართველი ხალხის ნებას. ჩვენი ოფიციალური განცხადებები საქართველოს პარლამენტში შევა, ცესკო-ს მიერ პროპორციული საარჩევნო სიების გაუქმების შესახებ ოფიციალური დოკუმენტის მიღებისთანავე", - ნათქვამია ერთობლივ განცხადებაში.
ოპოზიციურმა პარტიებმა ხელი მოაწერეს ასევე საპარლამენტო პროპორციული საარჩევნო სიების გაუქმებასთან დაკავშირებულ განცხადებასაც.
"პოლიტიკური პარტიები, რომელთაც 2020 წლის 31 ოქტომბრის საპარლამენტო არჩევნების ცესკო-ს შედეგების მიხედვით გადავლახეთ დაწესებული ბარიერი და მოვხვდით უმაღლეს საკანონმდებლო ორგანოში, მივიჩნევთ, რომ არჩევნები გაყალბდა ქართული ოცნების მიერ და ის არ ასახავს ქართველი ხალხის ნებას. შესაბამისად, მივმართავთ ცენტრალურ საარჩევნო კომისიას მოთხოვნით, გააუქმოს ჩვენს მიერ წარდგენილი პროპორციული საარჩევნო სიები", - ვკითხულობთ განცხადებაში.
კიდევ ერთი განცხადება, რომელსაც ოპოზიციურმა პარტიებმა მოაწერეს ხელი, ეხება პარლამენტის ბოიკოტირების საკითხს.
"2020 წლის 31 ოქტომბრის საქართველოს პარლამენტის არჩევნები ჩატარდა ამომრჩეველზე ძალადობის, მოსყიდვის, საარჩევნო ოქმების მანიპულაციისა და სხვა მძიმე დარღვევების ფონზე, რის გამოც არჩევნები ითვლება გაყალბებულად და არ ასახავს ქართველი ხალხის ნებას.
საქართველოს დემოკრატიული პოლიტიკური პარტიები არ ვაღიარებთ არჩევნების შედეგებს ლეგიტიმურად, ბოიკოტს ვუცხადებთ არალეგიტიმური საკანონმდებლო ორგანოს ფუნქციონირებას და ვითხოვთ ახალი არჩევნების ჩატარებას", - აღნიშნულია განცხადებაში.
ერთობლივ განცხადებებს ხელი მოაწერეს "ნაციონალურმა მოძრაობამ", "ევროპულმა საქართველომ", "სტრატეგია აღმაშენებლმა", "ლეიბორისტული პარტია,", "ლელო საქართველოსთვის".
