ადვოკატი გიორგი მშვენიერაძე აქვეყნებს ორ დოკუმენტს, რომლის თანახმადაც, მისი კარტოგრაფების საქმეზე დაკავებული ნატალია ილიჩოვა ქართული ოცნების ლიდერებს მადლობის სიგელითა და სამკერდე ნიშნით ყავთ დაჯილდოებული.
კერძოდ, მშვენიერაზე ამბობს, რომ მადლობის სიგელი ილიჩოვას თავდაცვის მინისტრმა ირაკლი ღარიბაშვილმა, ხოლო სამკერდე ნიშანი პრემიერმინისტრმა გიორგი გახარიამ გადასცეს.
ღარიბაშვილის მიერ გაცემული მადლობის სიგელი 2013 წლით არის დათარიღებული, როცა ის შინაგან საქმეთა მინისტრის თანამდებობას იკავებდა, ხოლო გახარიას მიერ გაცემული სამკერდე ნიშანი 2019 წლით.
"ცნობისთვის, ნატალია ილიჩოვა სამსახურებრივი მოვალეობის სანიმუშოდ შესრულებისთვის და საზღვრის დაცვის საქმეში მიღწეული წარმატებისთვის ირაკლი ღარიბაშვილს ყავს მადლობის სიგელით დანაჯილდოები, ხოლო უმწიკვლო სამსახურისთვის კი, სამკერდე ნიშნით - გიორგი გახარიას. ნუთუ, ოდნავ მაინც არ აწუხებთ სირცხვილის გრძნობა იმის გამო, რასაც ახლა ამ ადამიანს უკეთებენ", - წერს გიორგი მშვენიერაძე.
2020 წლის 7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.
ივერი მელაშვილსა და ნატალია ილიჩოვას აღკვეთის ღონისძიების სახით პატიმრობა 8 ოქტომბერს შეეფარდათ.
პროკურატურის მტკიცებით, კომისიის ყოფილი წევრები საზღვრების დელიმიტაციის პროცესში 1970-80-იან წლებში გამოცემულ რუკებზე დატანილი საზღვრის ხაზებით ხელმძღვანელობდნენ, რაც მათივე განცხადებით, საქართველოს ისტორიულ საზღვარს არსებითად ეწინააღმდეგება.
გამოძიების ცნობით, სამართალდამცველებმა ჩხრეკისას 1938 წლის რუკა ამოიღეს, რომელზეც, დავით გარეჯის სამონასტრო კომპლექსი საქართველოს ტერიტორიაზე იყო მოხვედრილი, რასაც, პროკურატურის მტკიცებით, ბრალდებულები კომისიის წევრებს უმალავდნენ, რათა ის არ გამოეყენებინათ საზღვრების დელიმიტაციის პროცესში.
ბრალის დამტკიცების შემთხვევაში ილიჩოვასა და მელაშვილს 10-დან 15 წლამდე პატიმრობა ემუქრებათ.
30 ნოემბერს თბილისის სააპელაციო სასამართლომ იმსჯელა აღკვეთის ღონისძიების შეცვლაზე და ნატალია ილიჩოვა და ივერი მელაშვილი კვლავ პატიმრობაში დატოვა.