ბათუმში კორონავირუსით 31 წლის ქალი გარდაიცვალა. ინფორმაციას „ბათუმელები“ ავრცელებს. გამოცემის ინფორაციით, სოფელ ერგეში მცხოვრები რუსუდან კოკობინაძე დღეს გარდაიცვალა.
კლინიკა „მედინას“ დირექტორი ჯუმბერ უნგიაძე ამბობს, რომ ქალი კოვიდინფიცირებული იყო და მას საკეისრო კვეთა ბათუმის სამშობიარო სახლში 25 ნოემბერს ჩაუტარეს. 27 ნოემბერს კი ის გართულებებით კლინიკა „მედინაში“ გადაიყვანეს.
უნგიაძის ინფორმაციით, მას თანმდევი დაავადებები არ აღენიშნებოდა, ჰქონდა ძლიერი სუნთქვის უკმარისობა, შესაბამისი კვლევების ჩატარების შემდეგ კი დადგინდა, რომ რუსუდან კოკობინაძეს ჰქონდა ფილტვების მძიმე დაზიანება.
„ფაქტობრივად ფილტვი აღარ იყო“, – თქვა ექიმმა. მისივე ინფორმაციით პაციენტის მდგომარეობა 1, 2 დეკემბერს გაუმჯობესდა, თუმცა დღეს ისევ დამძიმდა და ის თრომბოემბოლიით გარდაიცვალა.
რაც შეეხება ახალშობილს, ექიმის თქმით ბავშვი ჯანმრთელია და ის სახლშია.
