გარემოს დაცვისა და სოფლის მეურნეობის სამინისტროს ორგანიზებით, ეროვნული სატყეო პროგრამის (NFP) ფარგლებში, „ტყის აღდგენისა და დაცვის“ სამუშაო ჯგუფის ონლაინ შეხვედრა გაიმართა.
► შეხვედრაზე, საქართველოს ტყეებში კოლხური ბზის, ნაძვის, ფიჭვის, წაბლის ხე-მცენარეების სანიტარიული მდგომარეობა, ასევე, მავნებლების წინააღმდეგ ჩატარებული ღონისძიებების შედეგები და დაგეგმილი კვლევები განიხილეს.
► როგორც შეხვედრაზე აღინიშნა, ბზის მავნებელის, ალურას წინააღმდგ ბოლო წლების განმავლობაში თანმიმდევრულად განხორციელებული კომპლექსური ბრძოლის ღონისძიებების შედეგების მიხედვით, საკონსერვაციოდ გამოყოფილ ტერიტორიაზე თითქმის აღარ შეინიშნება მავნე მწერის პროგრესირება, ხოლო, ბზის კორომების ზოგადი მდგომარეობა საიმედოდ მიიჩნევა და ტერიტორიები რჩება მონიტორინგის ქვეშ.
► აღსანიშნავია, რომ სამეცნიერო ექსპერიმენტი წაბლის კიბოს წინააღმდეგ ბიოლოგიური კონტროლის მეთოდების გამოყენებით, საქართველოში პირველად მიმდინარეობს, რაც საერთაშორისო და ადგილობრივი ექსპერტების შერჩეული მეთოდოლოგიითა და ზედამხედველობით, ზესტაფონის სატყეო უბანზე ხორციელდება. ექსპერიმენტის პირველადი შედეგები მომდევნო წლის გაზაფხულზე იქნება ცნობილი.
► შეხვედრის ფარგლებში, მონაწილეებმა, ტყის აღდგენისა და დაცვის მიზნით, 2021 წლის სამოქმედო გეგმა და რეკომენდაციები შეიმუშავეს.
► მნიშვნელოვანია, რომ NFP-ის სამუშაო ჯგუფის მიზანი ტყის აღდგენის, გაშენებისა და მოვლის მხარდაჭერა, აგრეთვე, ტყეების მავნებელ-დაავადებებისაგან დაცვის მეთოდების შემუშავებაა.
► ონლაინ შეხვედრას გარემოს დაცვისა და სოფლის მეურნეობის სამინისტროს სისტემაში შემავალი შესაბამისი უწყებების, ასევე, ქალაქ თბილისის მუნიციპალიტეტის მერიის, სსიპ აჭარის სატყეო სააგენტოს და სხვა ჩართული და დაინტერესებული ორგანიზაციების წარმომადგენლები ესწრებოდნენ.
