ჩვენ შევდივართ უკვე პიკში და ეს რამდენხანს გაგრძელდება, არ ვიცით. განაცხადა დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალურმა დირექტორმა, ამირან გამყრელიძემ.
მისი თქმით, დღეს გამოვლენილმა კორონავირუსის 3 128 შემთხვევამ "არ უნდა დაგვამშვიდოს, რადგან ინფიცირების შემთხვევები არ იკლებს, პირიქით, მატებაა".
"ჩვენთან დღეს 3 128 ახალი შემთხვევაა, მაგრამ ეს არ არის ასე ვთქვათ შესაბამისობაში ქვეყანაში დღეს ინფექციის გავრცელებასთან. მოგეხსენებათ, რომ ჩვენ ბოლო პერიოდის განმავლობაში გადავცილდით 4 000 ახალ შემთხვევას, შეგვიძლია ვთქვათ, შევედით პიკში, უბრალოდ დღევანდელი შემთხვევების რაოდენობა დამოკიდებული იყო ამ სამ დღეზე, როდესაც ტესტირების რაოდენობა შაბათ კვირას და განსაკუთრებით სადღესასწაულო დღეებში ეცემა, გუშინ და გუშინ წინ ჩვენ "პისიარის" და ანტიგენის ერთად აღებული ტესტირების რაოდენობა გვქონდა სადღაც 7 000-დან 8 000-ის ფარგლებში, როდესაც კვირის სხვა დღეებში ერთად აღებული გვაქვს 12 000-13 000-ის ფარგლებში. ამიტომ ეს რაოდენობა - 3 128 ნუ დაგვამშვიდებს, რადგან კლება ჯერ არ არის, პირიქით არის მატება, რომელიც კიდევ გაგრძელდება, რადგან ჩვენ შევდივართ უკვე პიკში და რამდენხანს გაგრძელდება, არ ვიცით", - განაცხადა ამირან გამყრელიძემ.
