საქართველოს საფეხბურთო ნაკრების ყოფილი ფეხბურთელი შოთა არველაძე სოციალურ ქსელში ეხმიანება საქართველოს მთავრობის გადაწყვეტილებას, რომლის მიხედვითაც გუშინდელ მატჩზე, საქართველო-ჩრდილოეთ მაკედონიას შორის, გულშემატკივარს არ მიეცა შესაძლებლობა, სტადიონიდან ედევნებინა თვალი თამაშისთვის.
შოთა არველაძის განცხადებით, ის არ იწონებს ამ გადაწყვეტილებას, რადგან "გულშემატკივარი იმსახურებდა ამ მატჩზე ყოფნას და ფეხბურთელებიც იმსახურებდნენ მათ მხარდაჭერას".
"ძალიან სამწუხაროდ და ყველასთვის გულსატკენად დასრულდა მატჩი, რომელსაც 2 წელი ველოდით. თუმცა, რეალობას თვალი უნდა გავუსწოროთ – ასეთი მნიშვნელობის მატჩი, ჯერ ამ ნაკრებს, ამ ფეხბურთელებს არ უთამაშიათ. ასეთმა წნეხმა, პასუხისმგებლობამ, ფსიქოლოგიურმა ზეწოლამ და ცარიელმა ტრიბუნებმა ფეხბურთელებზე ყველაზე მეტად იმოქმედა. ნამდვილად ვერ მოვიწონებ და ვერ დავეთანხმები გადაწყვეტილებას, სტადიონზე გულშემატკივრის არ დაშვების შესახებ. ეს ჩვენი მთავარი იარაღი უნდა ყოფილიყო. ვალდებულები ვიყავით ეს ფაქტორი ჩვენ სასიკეთოდ გამოგვეყენებინა. ამხელა ქალაქში, ამხელა სტადიონზე ამის ორგანიზება შეიძლებოდა. გულშემატკივარი იმსახურებდა ამ მატჩზე ყოფნას და ფეხბურთელებიც იმსახურებდნენ მათ მხარდაჭერას. მიუხედავად მძიმე შედეგისა, ეს მარცხი კარგ გამოცდილებად უნდა ვაქციოთ და უნდა ვცადოთ, რომ ამ რანგის მატჩები კიდევ ვითამაშოთ. არც აქამდე გავსულვართ დიდ საფეხბურთო ფორუმზე, არც ჯგუფური ეტაპი მოგვიგია და არც ფინალში გვითამაშია. ამიტომ, სწორი დასკვნები უნდა გავაკეთოთ და იმ მიზნისკენ სიარული, რომელსაც ევროპის ან მსოფლიო ჩემპიონატზე თამაში ქვია, გუშინდელი დღით არ უნდა დავასრულოთ. მოდის თაობა, რომელიც ამას მიაღწევს", - აცხადებს შოთა არველაძე.
შეგახსენებთ, საფეხბურთო მატჩს გულშემატკივრები სტადიონთან დამონტაჟებული ეკრანიდან ადევნებდნენ თვალს, მატჩს კი ფეხბურთის ფედერაციის წარმომადგენლები, თბილისის მერი კახა კალაძე და ქართული ოცნების აღმასრულებელი მდივანი ირაკლი კობახიძე ესწრებოდნენ.
საქართველოს ნაკრებმა ჩრდილოეთ მაკედონიასთან 0:1 წააგო და ევროპის ჩემპიონატის საგზური ვერ მოიპოვა.
